Ba kiew palat ka bor ding, leit ujor ka JSU sha MePDCL

Shillong: Ka Jaintia Students Union (JSU), ka la leit kynduh ia u AEE ka MePDCL ha Jowai ban iakren halor ka jingeh u paidbah ka thaiñ Jaintia, namar ba kiew syndet ka bill light ha kine ki khyndiat bnai.

Ka seng ka dawa na ka tnat ba dei ban pynbeit kloi ia kane ka jingbakla halor ka rukom shim bad thew ia u metre.

Ka seng ka lah ai ruh da ka dorkhas sha u AEE bad SE ka tnad MePDCL halor ki 3 tylli ki mat bad kitei ki kynthup ba ka MePDCL ka dei ban pynbeit mardor ha lor ka jingtorti ban khein ia ka bill light kaba poi da ki phew phew hajar, nangta la dawa ba ka tnat MeEPDCL kadei ban buh briew ban wan shim tista ia ka bill light man la u bnai ban suk u paidbah ban siew ha ka dor ba rit namar da buh teng da da ki bnai, ka bill kan lang shibun shah bad ki longing kiba duna haka jingioh kin ym kot bor ban siew shisien siew bad kane ka buh jingeh.

Hadien ba ka tnad MePDCL ka pynsngew ba duna palat ki nongtrei (shortage of man power) ban wan shim ia ki bill light, ka seng ka dawa ba dei ban ai kam da ki khynnah samla na ki shnong bad na ki elaka ban shim jingkhein ia ki meter bad lum ia ka bill light da kaba ithuh na ka shnong, da kaba ka tnad MeEPDCL, kan ai bor ba kin lum ia ka bill light ha ka por kaba biang.