Saphriang ki khubor thok, halor ka jingkhangdam ha Meghalaya

Shillong:Katto katne ki kynhun ki la pynsaphriang ia ka jingthoh kaba la rim kaba la buh ha ka Twitter account jong ka DD News Shilong kaba pynpaw ba u Myntri Rangbah ka jylla, u Conrad K Sangma u la pynbna ban kan don ka jingkhangdam kaba ar sngi katta ha ka sngi Nyngkong bad ka sngi Baar ha nongbah Shillong. La ong ruh ba la pynjari ia kane ka jingkhangdam ban wad ia ki briew kiba iakynduh ia kiba long positive ia ka jingpang khlam COVID-19 ha Shillong.

Na ka liang ka DD News Shillong ka la pynshai ba kane ka jingthoh ka dei kaba buh ha Twitter ha ka 11 tarik u Naitung bad ha kajuh ka por, ka la pynshai ruh ba kam khlem shim buh kino kino ki jingthoh halor kano kano ka jingpynbna na ka liang u Myntri Rangbah ka jylla mynta ka sngi (23.08.2020).

Ka jingsaphriang ia kane ka khubor thok ka long kaba donkam ban pynrem jur. La kyrpad ia ki paidbah ba kim dei ban pynsaphriang ia ki jingtip ki bym don ka jingshisha.