Khlad sa iwei na u COVID-19 ha Tura; ryngkat bad ki ummat ai khublei uba la koit ia ki doktor bad ki nos

Shillong: Iwei I tymmen briew iba la 84 snem ka rta, I ba la ngat ha u khñiang jingpang COVID-19, I la khlad noh ha Tura Civil hospital ha ka miet jong ka 22 tarik u Nailar, ha kaba ka jingkhlad jong kiba pang COVID-19 ki la poi sha ka phra ngut.

Haba iakren bad u Deputy Commissioner jong ka West Garo Hills lyngba ka phone, u Ram Singh u la iathuh ba ia ine I tymmen rangbah la lap ba don ia u COVID-19 ha ka por ba leh ia ka random test ha Tikrikilla.

“Ka long kaei kaei kaba sngewsih ha kaba iwei I tymmen rangbah iba la 84 snem ka rta I la ioh ia u COVID-19 hadien ba leh ia ka random test ha Tikrikilla bad I la thiah pang ha TCH Covid ward ha ka18 tarik u Nailar, I la khlad noh hynnin ka miet. Ngi pynpaw ka jingsngewsih sha ki bahaing hasem jong I. Ai ba ka mynsiem jong I kan don ha ka jingsuk”, ong u Singh.

U DC u la iathuh ruh ba uwei u rangbah ba la 54 snem ka rta u la jem bad u la mih noh hadien ka jingsumar bad hadien ba u la pyndep ia ka quarantine ha Covid ward ha Tura Civil hospital. Une u rangbah u la ai khublei ryngkat bad ka jingjaw ummat ia ki doktor, ki nos, ia ki nongtrei ka koit ka khiah bad ia u Blei Nongbuh Nongthaw.