Sam ei shatri, ka sorkar ia ki nongtrei Grade IV ka Secretariat

Shillong, 3 Nohprah:
Ka sorkar jylla Meghalaya dang shen ka dang shu dep sam shatri sha baroh ki nongtrei Grade IV jong ka Secretariat. Ia kane ka jingsam shatri, la leh lyngba ka tnad Secretariat Administration Department (SAD).
Kat kum ka jingtip ba la ioh lyngba ka ain wad jingtip paidbah ba la ioh na u Deputy Secretary ka sorkar jylla ka Secretariat Administration, ka sorkar jylla dang shen ka sam shatri ei haduh 515 ngut ki nongtrei Grade IV ka Secretariat kynthup 199 ngut ki kynthei bad haduh 316 ngut ki shynrang.
Na bynta kine ki shatri ka sorkar ka la pynlut T.1,89,730 (shi lak phra phew khyndai hajar hynniew spah lai phew) bad ki shatri ki don la ka jong ka jong na bynta ki kynthei bad shynrang. Ki shatri na bynta ki kynthei ka don ar jait ha la ka jong ka dor.
Ka dor jong kine ki shatri ki long T.350 kawei jong ka kompeni Mahendra Dutt kaba khlem thoh rong bad T.360 kaba khleh rong. Kane ka long na ka bynta ki kynthei. Katba T.380 kawei jong ka Mahindra Dutt ka shatri shynrang, T.180 ka shatri kynthei bad shynrang jong ka kompeni Citizen.
Ha kane ka ain wad jingtip, la kdew ba ka sorkar man ka shisien ha ka ar snem ka ju sam shatri sha man iwei pa iwei ki nongtrei Secretariat.
Na ka bynta kane, ka sorkar ka la khot da ka tender ia ki nongsam bad katkum ba la ioh da ka ain jingtip, la pyni ba la don 7 ngut kiba ioh ban sam ia ki shatri sha ki 515 ngut ki nongtrei jong ka Secretariat.
Kine ki hynniew ngut ki nongsam ne kontraktor ba la shah jied ha ka sorkar ki kynthup ia ka M/s I Nongsiej na Jaiaw Laitdom, MS/. SS Enterprise na Lower Mawprem, Lumsohphoh Shilong, M/s M Syiemlieh na Lower Mawprem, Lumsohphoh Shillong, M/s F Syiemlieh na Mawlai Phudmuri, Shillong, M/s Banker Enterprise na Range View, Riatsamthiah, Shillong, M/s Kerrida Enterprise na Mawlai Phudmuri, Nongmadan Shillong bad ka M/s JS Enterprise na Pohkseh East, Shillong.