Na u covid, shim kabu ki bor shnong

Bah Monarch Shabong

Kane ka jingpang covid, ka la pyn kulmar jingmut than ia baroh u paidlang ha ka pyrthei hi baroh kawei bad katei ka jing kulmar jingmut, ka la pur sha ki bynta jong ka Ri Khasi Jaintia ruh, ha kaba la iohi, ha kine ki sngi, ba ki bor sorkar, ki riew paidbah lem bad ki bor shnong ruh, ki la kulmar jingmut hi thlim na kane ka khlam.

Ka mat jingiakren hangne, ka long halor ka jing shim kabu jong ki bor pyniaid shnong ia ki riew paidbah, da ki kyndon kiba pher bapher, halor ka mat jing iada ia ka jing ia pur ka khlam covid. La iohi ia ki khubor, ba ki don kiba leit sah sha khlaw, don kiba shah khang sbak ha la iing, na ka daw ba ki mih na shnong, ban leit jingleit shabar bad kitei ki dei tang khyndiat tylli ki nuksa, hynrei ki dang don bun bah, ki jingshah pyndik jong ki riew paidbah, ha ki kyndon bapher bad kitei ki jingleh baroh, ki long kiba beain bad kiba ki bor sorkar, ki dei ban nym shah da lei lei ruh.

Mynta ka dei ka juk mobile, ha kaba kawei pa kawei ka kti, ka don mobile bad kumta, ba kin don kine ki kam bieit, ka long ka jing leh niewbein kaba jur bad ki bor District, ki dei ban shimti ia ka jing kitkhlieh ban pynbeit toin, ia kiba kum kine ki kam beain. Kam dei tang ka jingleit shong sha khlaw, lane ka jingshah set kut ha iing, hynrei ki don bun ki shnong, kiba dang pynieng ia ki khyrdop, ha bar shnong, da kaba ki khanglad ia ka rung ka mih jong ki riew paidbah, (katba ki ailad pat ia kiba leit on kyiad man ka sngi) bad katei ka khanglad ia ki nongshong shnong, ba kin leit sha ki bri ki khyndew, leit bylla sha ki marjan shnong marjan thaw bad katei ka dei ka kam pyndik kaba la palat.

Ka jingshisha, kaba paw na kine ki jingjia ha kine ki sngi, ka pyni ba ka jing ia trei lang hapdeng ki shnong bad ki Block ophis bad ki ophis jong ki Deputy Commissioner, kam don satia bad haba ka long kumne, ki don bun kiba shim kabu ia ka ain ha la ka jong ka kti.

Ka nuksa, kaba ki shnong ki dei ban shim, ka long ba kiba bun ki iing ha sor, ki don ha ka jing khang dam bad kitei ki dei beit tang kito ki jaka, kiba la thikna ba don kiba pang corona lane ba don kiba iajan bad kiba ioh pang bad kam dei shuh kato ka ain leh antad, kaba mynshwa, ha kaba ia khang ia uba shait ba khlain, ha ka por ba tang u corona ruh um pat tip lynti ban wan rung sha Ri Khasi.