Ka Jingsneng Tymmen (Na ka bynta ki Class X)

Ka lynnong kaba XL bad XLI.

Babu Kular Khongjirem

[ba bteng] Ha kane ka lynnong pat,u nongthoh u iai ban biang sa shisien halor ka jingdonkam bad jingkordor ka akor babha.U ong ba,dei ka akor babha kein kaba teh skhem bad pynia ieit,pyniajan ia ka jingiadei shi kur shi jait,ka jingiadei ba ha iing ha sem da ka hok ka sot.Kumba la batai sha khmat,dei ka akor babha kein kaba tam ha pyrthei kaba pynwandur bad wanrah jingkyrkhu na u Blei.Ia kane ka jingsneng ym dei ban khein kai ne pynpute bad ym dei ruh ban leh klet ne leh dule.

U nongthoh u ong ba kane ka akor babha kam dei ban neh tang shi pateng ar pateng hynrei ka iai bteng ha ki khun ki pyrsa ter ter.Dei tang haba don ka akor bad ka jinglong kaba bha ba ka don ka shong suk shong sain ha u para bynriew la ha iing ha sem bad ha shnong ha thaw ruh kumjuh.Lada ki khun ki ksiew bad ki iing ki sem kilong kiba don akor bad don burom,katno ka long ka jingsarong bad ka jingkmen ia ki kmie ki kpa.Ki kmie ki kpa kin phuh mut phuh mat kum u syntiew.

Hynrei haba ki khun ki ksiew kilong kiba sniew jinglong bad khlem akor,ka jingsngewsih bad pangnud kan jia ha ki kmie ki kpa.Kan lip rong,jah burom khein burom ei ki kmie ki kpa. Budnam ei khait ki kmie ki kpa.Ka kupar ne nusip jot kan pyn lip rong ne pynjah burom ia ka nam bad ka kyrteng ki kmie ki kpa bad ka ing ka sem hi baroh kawei. Ha ka lynnong ba khaduh pat(lynnong XLI) u nongthoh u kyntu ba ym dei ban klet ban duwai ne kynmaw ia u Blei man ka por.Dei ma U uba ai bor,Uba pynbit pynbiang bad kyrkhu ha ka jing im jongngi kaba man la ka sngi ha kane ka pyrthei.Kaba kynmaw bad iai duwai ia u Blei kan pyneh rngiew pyneh rwiang ha ki liang baroh naduh ka trei ka ktah,ka khaii ka pateng bad ka thoh ka pule ban nang kiew,nangroi bad nang iohnong kyrkhai.Duwai bad kyrkhu ia u Blei ba un ai ka spah ka phew(synniang bynhei),kan biang ka kam ka jam bad ban khraw ne pawnam ka main ne ka kyrdan long kynthei ne long shynrang ha kane ka pyrthei.

Haba ioh nam ioh burom maphi,phuh bad phieng bad ioh burom kit burom lang ka jait ka khong jongphi bad shngain bad phuh mut phuh mat ki kur ki kha bad kiba ha iing ha sem baroh. Dei ban ainguh bad duwai ia u Blei shwa ban khie mynstep bad shwa ba phin trei phin ktah bad shwa ban thiah ruh kum myn miet kumjuh.Dei ma U uba thaw uba buh naduh hyndai kulong kumah naduh u Thawlang,u Suidnia bad ka Iawbei ba kin sei bad iai bteng ka long bynriew man bynriew pateng la pateng ha ka long shynrang ne long kynthei.Dei ban nguh bad mane tang ia U hi(ym dei ia kiwei pat) namar kadei nongrim bah ne dhorom jong ka met bad ka mynsiem jong u briew ne ka briew katba ki dang don ha kane ka pyrthei.U nongthoh u kyntu ia baroh ki longdien man dien ba ym dei ban klet da lei lei ruh ia kata ka nongrim bah ne dhorom kaba dang neh dang sah naduh hyndai hynthai haduh kane ka pateng ba mynta bad ka pateng ban dang wan ruh bad kan iai tyllun bad iai neh ha kane ka snieh pyrthei baroh.

Haba duwai bad nguh ia u Blei pat,dei ban da pdiang da kaba nguh ar ti ar jat bad da nguh bad da dem ngon la ka khlieh kum ka dak ba phi burom shisha ia U bad u Blei u la tip ban iarap,shanbor bad kyrkhu shisha la haba rieh ne ba paw ruh kumjuh kam pher. Hynrei,kaba sngewsih bad pynpang dohnud eh ia u nongsneng kalong ba,ha kine ki por,ki khun samla bad ki londien man dien kim salia shuh ia ka akor ka burom khasi ba la hikai ki kni ki kpa tymmen jongngi mynshwa.Ki iaid lait,leh mon pynban bad leh khongpong pynban ia kaba la hikai ki longshwa manshwa ia kaba hok,kaba bha bad kaba dei. Ym don ba kheinkor ne niewkor shuh,ym don ba pdiang ne kohnguh shuh hynrei ki saitlah pynban bad leh katba ki sngewbit.Ki kren da kumwei bad leh pat da khongpong.Long thik kumba ‘kohnguh ka khlieh kyrngah pat u tdong kum u ksew’Dei kane kein kaba pyllong bad wanrah ka jingsniew,ka jingthala bad ka jingjah burom bad jem syndon ka rngiew ka rwiang ka jait bynriew hakhmat ka pyrthei ba iar.

Kumta,U nongsneng u pynkut da kaba khyrwit ia ka jaitbynriew jongngi lyngba kine ki lain:”A!Jingsneng Akor Khasi, Hangno pha don mynta sha, Ha dohnud ki khun ka Ri, Ne ym don ba pdiang ia pha? (lah kut ka Jingsneng tymmen,next issue,pule shaphang ka Dorbar ki Khasi Hyndai na ka kot pule’Ki Dienjat ki Longshwa)