rBad ka shah tait shnong bad ka shah khang leit skul T.5000ka kuna, byrngem ka Mawkhli ia kiba iuh kjat ha iing Kong Nongbri

Shillong, 2 Nohprah:
Kawei ka longiing ha ka shnong Mawkhli la kynnoh ba ka la shah tait ha ka bor shnong namar ba ki thmu ban pynduh noh ia ka na ka kam samja sngi sha ki khynnah kum ka nongtrei Aganwadi ha katei ka shnong kaba hap hapoh ka konstiwensi jong ka Mawthadraishan ka west Khasi Hills District.
Ha ka jingiakren mynta ka sngi, ba kane ka longkmie kaba kyrteng ka Kong T. Nongbri ka la kynnoh ba ka bor shnong Mawkhli hapoh ka jingialam u Sordar Blesstar Wahspeh ki la tait shnong ia ka iing jong ka lem bad ki saw ngut ki khun bad u lok jong ka ha ka 24 tarik Rissaw 2014.
“Ym tang ba ki tait shnong hynrei ki la khang pyrshah ia ki khun ba kin leit skul ha kane ka shnong bad ki la byrngem ruh ban nym shah ia ki khun ba kin leit shim resol ha ka 12 tarik Nohprah”, la kynnoh ka kong Nongbri.
Ka kong Nongbri ka la kynnoh ruh ba ka bor pyniaid ka shnong ki la thung bujli da kawei pat ka briew ban trei kum ka Aganwadi watla kam pat shym la iehnoh ia katei ka kam.
“Ka bor pyniaid shnong ki la phah risain jubor ianga na kane ka kam hynrei haduh mynta ngam pat shym la risain na kane ka kam”, la kam ka Kong Nongbri.
Ka la kynnoh ruh ba ka bor shnong ym tang ba ki tait shnong ia ka hynrei wat ia u khaw reshon (BPL), bad kim shah shuh ban trtei bylla na ka skhim NREGS ki la pynduh naduh ba ki la rai ban tait shnong ia ka longing jong ka.
Ym tang katta, ka bor shnong ruh ka la pynduh ruh ia ka um bam umdih, ka bording bad ka la rai ruh ba kino kino ki briew na kane ka shnong kiba kiew ha ka iing jong ka kin shah dain kuna T.5000.
Halor kane ka jingshah ban bein kane ka longing ka la pan jingiarap na ka kong Agnes Khashiing ba kan leh eiei halor kane ka kam.
Na ka liang ka kong Agnes ka la ong ba kan ai ka jingujor sha u Deputy Commissioner halor kane namar ba ka jingtait shnong ka long beain haduh katta katta.