Bitar ki kristan, ba shah thang ka iingmane ha Delhi

New Delhi, 2 Nohprah:
900ngut ki kristan, ki la leit tur sha ka kut pulit ha Delhi, ha kaba ki la dawa, na ka bynta ban tohkit mardor, ia ka jingpluh jong ka iingmane St Sebastian ha Dilshad Garden, kaba la jia ha ka Lah Sngi U Blei. La iathuh ba ki pulit, ki leh suki palat, ha kaba pynlong ia ka jingtohkit bad ki poi suki ruh ban peit ia katei ka iingmane.
Katei jingtur paid bah, ka sdang ha ka por 10baje mynstep bad ka iai bteng haduh ka por 12.30 nohsngi, ha kaba ki don bun ki samla pule, ki nongialam niam jong ka Balang Catholic, ki leit ban ia lum lang ha katei ka jingleit ha kut ki pulit, ha kaba ki la khang ia ki kali ba kin iaid, na ka bynta ar kynta kynthih.
La iohi, ia katei ka ding, kaba klang da u nongap jong katei ka iingmane ha ka por 6.30 mynstep jong ka Lah Sngi U Blei bad ula pyntip mar mar sha u lyngdoh jong katei ka Parish, U Father Anthony. Kito kiba leit jingiaseng, ki kynnoh, ba katei ka dei ka jingjia, kaba la shu thang dusmon bad kam dei ba ka kem ding hi kumto. La don ruh kiba iathoh, ba ka don ka jingsma sharak, ha ka por ba ka ding ka dang klang ha katei ka iingmane.