Pynpra Mandir, ka tnat Veterinary ha Upper Shillong

Shillong, 1 Nohprah:
Ka tnad Directorate jong ka A.H Veterinary ka la pynpra ia kawei ka jaka mane blei – Mandir kaba don hapoh u pud u sam jong katei ka tnad ha Veterinary IDP 6 mer Upper Shillong.
Katei ka jingleit pynpra katei ka tnad ka dei hadien ba ka Hynniew trep Youth Council, Upper Shillong Circle ka la leit ban ujor sha u Director katei ka tnad u Dr.J Jyrwa ia ka jingdon katei ka Mandir.
Hadien ba la iohi ia ka jingieng katei ka Mandir la ar ne lai snem hapoh u pud u sam jong ka Veterinary hapoh 6 Upper Shillong , ka HYC ka la leit ban wad jingtip kaba bniah lyngba ka ain wad jingtip ka RTI, bad ka la lap ba ia katei ka Mandir la shu tei donbor da ki nongtrei bar jylla jong katei ka tnad kiba shong basah ha ka Quarter jong ka bad ka la lap ba ka jingtei ia katei ka Mandir ka dei ka bym ioh jingbit nangno nangno ruh.
Kumta ha ka 5 tarik u naiwieng, 2014 ka HYC Upper Shillong hapoh ka jingialam u samla Danny Rynjah, President bad u samla Gee Mawlong General Secretary ha ryngkat ka jingsynranlang u samla Donbok Kharlyngdoh Vice President HYC Sengkmie bad ki dkhot na Mawlai Circle ki la leit ban ia kynduh ia u Director katei ka tnad u Dr.J.Jyrwa ban dawa ba katei ka tnad ka dei ban pynpra noh ia katei ka Mandir, bad ka HYC ka la ai por 30 sngi.
Hynrei shuwa ban kut katei ka 30 sngi na ka liang u Director u la lah ban phah pynpra ia katei ka Mandir be-ain kaba ieng hapoh u pud u sam ka tnad sorkar, bad na ka liang ka HYC ka la ai khublei kyrpang ia u Director uba la shimkhia ia katei ka kam. Ka kyrwoh na u GS u samla G.Mawlong ka la maham ba ka seng kan ym ailad ia kaba kum katei ka jingjia ba kan dang iai don hapoh ka thain Upper Shillong.