Ujor ka HYC ia ki nongap khyrdop ha Shillong Bye-Pass

Shillong, 1 Nohprah:
Ka Hynniewtrep Youth Council (HYC) Mawryngkneng circle mynta ka sngi, ka la leit ban ujor ejahar pyrshah ia ki nongap khyrdop ka Shillong Bye-Pass kaba don ha shnong Mwkhanu Raid Mawpdang East Khasi Hills District namar ba bun kim dei ki Khasi kiba shong ha katei ka kyrdon kaba ai kyrteng Toll Gate Plaza.
Ha ka ejahar ba ai ha u SP ka East Khasi Hills hynne ka sngi, ka HYC ka ong ba ka jingiohlad jong kine ki briew kiba nabar ban trei ha katei ka khyrdop khrong khajna ka la pynartatien kum ka seng kaba peit ia ka bha ka miat bad ka suk ka sain jong ka jaidbynriew Hynniewtrep.
Ka HYC ka la kyntu ia ki bor jong ka ain ba kin tohkit noh mardor ia kine ki briew kiba trei ha ka Toll Gate Plaza khnang ba kin pynshisha ba kidei shisha ne em ki briew kiba la ioh jingbit na ka tnad bylla ka jylla katkum ka kyndon jong ka Inter State Migrant Workmen bad kumjuh na ka KHADC.
Khang ban khanglad ia ki jingsniew bad ki kam pyntriem bapher bapher hapoh ka jylla ba bunsien ki ju leh da ki briew ki bym pat ithuh da ka ain ia ka jingtrei jingktah bad ia ka jaka sah jong ki hapoh ka jylla bad ka seng ka la kyrpad ia ki bor jong ka ain ba kin shim khia bad ba kin pynshitom ruh ia ki katkum ka ain lada jia ba kin wan trei wan ktah khlem da ioh jingbit shwa na ka tnad sorkar jong ka jylla.
Kane ka long katkum ka kyrwoh khubor ba la pyllait da u President ka HYC Mawryngkneng circle u Bah Riskhem Kharkamni.