“Yn theh tyngka sha ki nongrep piskot, ban pynmih 1 lak MT shisnem”

Shillong, 30 Naiwieng:
Ka sorkar Megha laya ha ryngkat ka jing iatreilang bad ka Indian Chamber of Commerce ha ka sngi saitjain jong ka taiew ka la pynlong ia ka jingiapyni nam Piskot ba la tip kum ka Piskot Festival 2014, la pynlong ia katei ka jingpyni nam ha Meghalaya House, Kolkata. Ka jingiapyni nam ia u Piskot ka dei ban pynshlur ia ki nongrep piskot jong kane ka jylla. Ha katei ka sngi la pyni nam ruh ia kiwei pat ki jait jhur, ki soh bad ki khniang thain jain kiba ka jylla Meghalaya ka pynmih.
U myntri pynroi nongkyndong ka sorkar jylla u bah Prestone Tynsong u la plie paidbah ia katei ka jingiapyni nam, ha ryngkat ka jing iadonlang u Principal Secretary katei ka tnad u KN Kumar, u principal Secretary ka state agriculuture bad horti-culture u P Kharkongor, u director ka West Bengal horticulture u Dr PK Pramanick, Director & MCS State Institute of Rural Development T Lyngwa, , u khlieh jong ka APEDA u CB Singh, bad u saiantis barim ka National Chemical Laboratory u Dr Nene, ryngkat ki spah ngut kiba la wan ba ia shim bynta.
U bah Prestone haba kren ha katei ka jingialang u la ong ba ka sorkar jylla ka don ak thong ban kyntiew ia ka kam pynmih piskot na kane ka jylla , ha kaba u la ong ba ka sorkar kan thaw ia ki skhim bad ki lad ki lynti ban iarap ia ki paidbah ba kin kham lah ba pynmih ia ki piskot kynthup naduh ki nongrep , ki nongpyniaid iew, ki nongthied, bad ki nongpyndonkam. U la ong ba hapoh katei ka shnad kaba ka sorkar kan pynleit jingmut ia ka kam pynmih piskot ka sorkar kan pynioh jingiarap ia ki nongrep naduh ki pisa ki tyngka bad ki buit kumno ban rep.
U la ong ruh ba ka sorkar kan pynthikna ba ka jingpynmih piskot kan kiew na ka por sha ka por, bad u piskot u ban pynmih un dei u piskot uba lah ban pynhun ia ki nongpyndonkam hapoh kan eka ri ne wat shabar ri, ia ka dor u piskot ban die ruh u bah Prestone u la ong baa k sorkar pynthikna ba un dei u ba ki nongrep kin im bad kin smat ia ka kam rep piskot.
U principal Secretary , u KN Kumar haba ai jingkren u la ong ba ka Meghalaya ka dei ka jylla kaba pynmih bun tam u piskot hapoh kane ka ri, bad ka pynmih kumba 50000MT manla u snem kata ruh khlem kano kano ka jingioh jingiarap na ka sorkar kaba tang khyndiat ruh sha ki nongrep. U la ong ba lada ka sorkar kan iarap pisa ia ki nongrep ka jylla kan lah ban pynmih haduh 100000 MT u piskot ha ka shisnem, bad lada ka lah ban pynmih kattei kan lah ruh ban pyndap ia ka jingdonkam piskot ha baroh kawei ka ri bad sha kiwei pat ki ri ka pyrthei.