BALEI IA NGA

S.K.N

[ba bteng] “Sngap noh wat hylla than ka Rida ka la sngewthuh hi…” La ong u Panah.
Marsien ong u Panah kumta, ka Kmie ka Rida ka la dom hi ria ka mynsiem…
“To pha la ioh mon mynta ba la don ba kyshan sa ia tip hi shato, ka jot ka bha…. Ngam tip shuh..”

Ka Rida ka la shu peit sha la ka Kmie bad ka la sngew dom lang ; hynrei u Panah pat u la shah sha ka.
“Haba kren Mei da sngewthuh …” La ong ka Rida.
Ha kata ka miet la mih ka jingiania ktien bnum shi bnum… Hynrei ka Rida ka la shu sngap namar ba u Panah u la nang kyrshan bad iakren na ka bynta jong ka. Ka jingiania na ka bynta ka Rida, ka la pynmih ka jingiadom jong ka Kmie jong ka bad u Kpa jong ka haduh ba ha kata ka miet u Kpa u khlem leit thiah lang shuh kumba ju long. Ka Rida pat ka la don ka jingsngew sheptieng ia lade namar ka tip ba kaei kaei ka bajia baroh; ka dei namar u Panah hi. Ha kata ka miet ka la shu thiah rit mynsiem watla ka don ha la kamra.

U Panah rui shi rui u khih, ka Rida dngong ka sngapthuh. La kynih u syiar nyngkong ruh, kam nud ban khap la ka khmat. Ka khmat ka la kwah thiah palat, hynrei haba synshar ka jingtieng kam nud ban ailad. Triang ka pyneh tad haduh ban da shai ka bneng bloit. Ka sa sdang ban khap la ki khmat namar ka jingshngain ka la don khyndiat haba la wan ka jingshai. Jlang ka iohthiah jai, tad haduh ba ka Kmie jong ka, ka wan ban kyrsiew namar ba la sngi palat.

Kaei kaba la jia ha ka miet ba la dep, ka step bathymmai kam pat lah ban ai dawai ia ka jingsngew pangnud ka Kmie bad u Panah ka Rida. Tymbum ki dang ia pyn-at, dihsha ruh la ka jong, bamja ruh la ka jong. Khatduh shuwa ban mih bylla u Panah u kren tang ia ka Rida
“Rida Ngan leit bylla noh ho…” U iathuh bad u sa mih noh artat.
“Hooid to…” Ka Rida ruh ka phai Ktien.

Ka jingialeh bajur ka la trei ha ka mynsiem ka Rida, ia kaei kaba la jia ha ka sngi ba la dep, la yn iathuh ne yn shu tyngkan tang ha lade; hynrei namar ba ka sheptieng ia la ka jingim, khatduh ka rai ban sngap la ka sngap. Ka Kmie ruh kam kylli ei ei shuh, ka la pyn palei ia lade kumba ju long, dei kata kaba pynhun ia ka mynsiem ka Rida ruh.

Haba la wan bylla u Panah, ka Rida ka la pynshet sha ka la ai sha ia u, kumba ka ju leh. Hapdeng ba dang dihsha u Panah u sei shi khung ki jingbam u ai ha ka Rida.

“Kine nga la wan thied ia phi…” U la ong
“O to khublei shibun…” La ong pat ka Rida
Hamar kata ka por wan mih ka Kmie jong ka, haba ka iohi ia kita ki jingbam ka la shu wiat rymmuin sha la ka khun. Haduh kata ka miet ruh u Panah um treh ban thiah bad ka Kmie jong ka, u jied ban thiah beit ha madan marwei. Kane ka la pynsyier mynsiem biang ia ka Rida. Kumta ha kata ka miet ruh kam nang thiah ka la shu sngap siar kaei ka ban jia. Kane ka jingleh u Panah ka la ai ha ka Rida ia ka sakhi bashai ba um ieid shuh ia ka Kmie jong ka. Ki Ktien ba la khlei u Panah ha Nanpolok ki la nang iai sawa jam ha ki tyndong shkor ka dohnud bad jingmut jingpyrkhat ka Rida
“Nga ieid ia phi…” Ba u ong
“Ia i Mei pat” ba ka pynphai ..

“Ngam ieid shuh…” Ba u jubab
Kine ki Ktien ki la iai sawa ha ka jingpyrkhat ka Rida. Haba ka iohi ia kaei kaba jia, shi ban ka la dap da ka mynsiem sngew synei ia la ka Kmie, namar ka sngewthuh ba u Panah um ieid shuh ia ka watla u dang shong dang sah ryngkat. Kane ka la mih shibun ki jingkylli hapoh ka dohnud ka Rida..
Hato ba i la kham tymmen…?
Hato ba im don khun shuh…?
Hato ba u mon ia nga…?

Kine ki la shad ha ka jabieng ka Rida ban ioh ia ka jubab.. Marwei marwei ym don ba tip ia kane ka thma ba ka ialeh hapoh ka nep.. Ha kane ka miet ba-ar ruh haduh ban da shai ka bneng bloit ka sa nud ban thiah.. Haba ka Kmie ka la khie na ba thiah, ka la lyngngoh balei ba ka Rida ka kylla jaipdeh kumne.! Kumta ka leit ban kyrsiew noh ia ka. Khyndiat khynsoit i la rung i jingsuba sniew ioh lehse don kaei re kaei hapdeng ka miet… [yn dang bteng]