Ka Jingsneng Tymmen (Na ka bynta ki class X) Lynnong kaba XXXVIII

Babu Kular Khongjirem

[ba bteng]Ha kane ka lynnong,u nongthoh u pynshlur ia ki longdien man dien ka ri jongngi ba kidei ban nang bad hikai ym tang ia ka rep ka riang hynrei ki dei ban nang hynrei ruh ban tbit ha ki kam khaii pateng.Kam da donkam eh ka bai seng la kaba rit ne ba heh kam pher hynrei lada iai minot bad trei hok ia ka kam,ngin sa kiew hi suki suki.

Lada trei minot hi thop ia kano kano ka kam,ngin nym iap thngan satia hynrei ngin ioh hi kat ban ioh bam ioh dih ha ing ha sem. Ka jingmlien ban shu shong sngi bad thiah sngi kan ialam ia u briew sha ka jingjaipdeh bad jing alhia.Ym ju bit ban shong kli kti hynrei dei ban mlien ban trei smat trei sting ia kano kano ka kam ba ngi trei.Ka jingjaituh,alhia bad kli kti ka ialam ia u briew sha ka jinglong kynduh, jingingkhong khait bad sa ka jinglong dukhi namar bym ioh ia kaba kwah ne angnud.

Ha ka kam khaii pateng,dei ruh ban nang ban khein ban diah namar kadei ka kam ba iadei bad ki kam pisa tyngka.Lada bakla khein ruh lah ban duh nong ei kha ma kha.Wat la ym nang ym stad ruh, hynrei dei ban tip bad nang ia ka khein ka diah da ka khleh ne bor kynmaw jingstad jabieng(ym dei da ka computer ne calculator kumba khein mynta).Nalorkata,dei ruh ban thir,ban pyrkhat bad plan bha jai ha ha kaba thiah ba shong ban nang kiew ka kam na kawei ka sngi sha kawei pat.Ka jingpynleit jingmut bad kitkhia ia ka kam kan pynroi ym tang ia ka kam khaii pateng hynrei ka pynproh ruh ia ka jingmut jingpyrkhat u briew.

Ha ka kam khaii pateng,lah ruh ban iadei kam bad u kamon u kadiang bad u dkhar u lyngkien. Na kine ki nongwei nongar,lah ruh ban ioh jingmut,ioh jinghikai na ki ia ka sap ka phong ba ki trei ma ki ia ka kam,tangba hap ban husiar bha pat ioh shah shet ei ha ki kha ma kha ba ki dei kiba sian bad kham tbit ban iangi.Pynshong nongrim bha ia la ka jingmut jingpyrkhat wat bam ja khluid ne kyrkieh ioh poi pynban sha ka duhnong,ka khlem rain bad ka jah burom.

Lada ngi nang ban leh ne trei janai ia ki kam baroh ba ngi trei,kan wanrah shisha ka jingkyrkhu ha ka jingim jongngi na ba kut haba kut.(yn dang bteng).