Shaei ki riew thoh, ia ka ktien Khasi?

Bah RM Shabong

Ki don shibun kiba pynpaw ia ka jingduh halor ka jingkhlad jong U Bah HS Shylla, uwei na ki nong ialam jong ka jaitbynriew. Hynrei, ha kaba iadei bad ka thoh ka tar Khasi, ka don sa kawei pat ka mat bad kata ka long ba ka jingkhlad noh jong utei u rangbah, ka la wan rah ia ka jingsah thylli jong ka sap jongu, ha ka thoh ka tar, ha kaba u ju pynmih ia bun bah ki jingthoh ha ki kotkhubor Khasi. Ki jingthoh jong U bah Shylla, ki dei halor ki ain ki kanun, halor ki kam shakri Blei, halor ki jingjia, kiba u sot na ki jing shisha, ha kaba iadei bad ka Sixth Scheduled bad kiba dei bad ki kam bishar, kiba iadei bad ki mukotduma bapher.

Ngi la duh shibun ki nongthoh artikel kiba khraw bad kitei ki kynthup naduh ka kyrteng jong U bah LG Shullai, U bah Hipshon Roy Kharshiing, U bah Rishan Khar lukhi, U Bah GN War bad sa shibun kiwei pat, kiba ju pyndonkam ia u khulom uba nep jongki, ban bsut ia ki jingmut ba remdor jongki sha ki nongpule kotkhubor bad hadien ka jingkhlad noh jong kitei, ngi iohi, kumba ki la duna shibun eh, kiba lah ban mih bujli bad mynta, ngi don sa tang U Bah Spiton Kharakor, U Bah BM Lanong, kiba dei ki nongthoh kiba la kham rim.

Ka ktien, ka dei u budlum jong kano kano ka jaitbynriew bad ka ju don ka jingong “im ka ktien, im ka jaitbynriew” bad ka jing iakhun, ha kine ki sngi, ka don na ka bynta ban ithuh ia ka ktien Khasi, ha ka khyrnit kaba phra jong ka riti synshar ri; hynrei ka don ka mat, kaba ha khmat duh bad kata ka long ba katba ngi dang ia shut ia la ki bor jabieng, ban tynruh sha Delhi, na bynta ban ithuh ia ka ktien Khasi; hynrei ngi don khyndiat ngut eh kiba shut ia la ka bor jabieng ban sei ia ki sap ba kynsai jongngi ban thoh sha u paidlang ka Ri Khasi Jaintia, na ka bynta ba ngin sngew bang ban pule bad ban ieid ia la ka ktien.

Ka jing pynmih ia ki jingthoh ha ki kotkhubor, kam dei tangba phi bsuh ia ki jingmut jongphi, halor ki phang bapher; hynrei phi bsuh ruh ia ka jingsngew ieid ia la ka jong ka ktien bad pynshlur ia kiba bun ba kin pule bad ba kin bud ryngkhi ruh, ha ka thoh ka tar bad ngi khmih lynti ia ki riew shemphang, ha ki kam ain, ki rukom shemphang ha ki jinglum jingtip lane ki nong hikai bad wat ki nongthoh biria, ba kin nym thait, hynrei ban sei ia la ki jong ki sap ha ki kotkhubor.