Huri hura ha Mawpait, Tlongpleng ba pyrshah ia u myntri, ban synreit dawai pyniap khñiang jingpang COVID-19

Shillong: Hadien ba la iohi ia ka jingsaphriang jong kawei ka video ba la don ka jinghuri hura ha kawei ka shnong, mynta ka sngi, na ka liang u nongthoh khubor u la ioh ban iakren bad u myntri jong ka shnong Mawpait Tlongpleng kaba hap ha ka Hima Maharam Syiemship kaba don ha South West Khasi Hills, u la pynshai halor kane ka jingjia.

U bah Donboklang Kharlyngdoh, uba dei u myntri jong ka Hima Maharam bad uba dei ruh kumjuh u Secretary jong ka sengbhalang HYC, u la iathuh ba kane ka Hima Maharam Syiemship haduh mynta ka dang don ka jingiakajia pud hima. Haduh mynta kane ka case ka dang don ha District Council, bad ha ka court ruh kumjuh.

Ia kane ka shnong naduh ki por hyndai la ithuh kum ka shnong Maharam, hynrei naduh u snem 1997 shajrong lyngba ka jinglehtuh jong ki katto katne ki rangbah kila thmu ban pyniasoh noh bad kawei pat ka shnong Bhawar, hynrei la don kiba pyrshah ia kane ka jingiasoh. Ha kane ka shnong ki la don ar tylli ki dorbar kiba la synshar, kata ka kynthup ia ka dorbar Mawpait bad kawei pat ka Bhawar.

Kane ka jingiakajia ka la jia hadien ba ki la don ki briew kiba la pyrshah ia kane ka jingsynreit dawai namar ba kiba bun ki briew jong kane ka shnong kim pat tip satia ba kane ka jingsynreit dawai kan long ban pyniap ia ka jingsaphriang u khñiang jingpang COVID-19 bad kine kiba pyrshah kidei ki kynhun kiba na kawei pat ka dorbar synshar. Ha kane ka jingiakajia, ki la don arngut kiba la kham mynsaw na ka bynta jong ka khlieh bad ryndang. U la ithuh ruh ba ha kane ka shnong ki don beit ki briew kiban pyrshah la kaba bha ne kaba sniew.

‘Kum ban shu pynkynmaw ka la don kawei ka jingshah batbor ha kane ka shnong bad kum u sordar, nga la ialam ia ki pulit jong ka Ranikor PS ban kem ia une u nongbatbor, hynrei ki bun kiba pyrshah ia kane. Ha u bnai March, ngi la leit plie ia kawei ka skul, kine ki paidbah ki don kiba pyrshah hynrei kim nud ktah kti namar la don lang ki pulit ba synran. Ha u snem ba ladep ruh, ngi la pynlong ia ka Independence Day football, ki don kiba la shoh ia ki briew jong ka Hima Maharam baf kane ruh la shu kut la ka kut hangto. Nga la kem teng ia uwei u briew uba nud ban leit buh kyiad ha phyllaw iingmane presbyterian bad ng la rah ia u sha Police Station, hynrei kine ki briew ki la ai ehjahar kylla ia nga bad kynnoh ba nga rahbor ia une uba buaid, bad wat haduh mynta ruh ki la don ki briew kiba la byrngem ban pyniap iano iano ruh,” iathuh u Bah Donboklang.

Haba iohi ba kiba bun ki briew jong kane ka shnong ki pyrshah beit la kadei ia kaba bha ne ia kaba sniew, u sordar u la ong, “lada ngi ialam iano iano u briew jong u Blei ne u briew jong u ksuid ruh kin pyrshah beit, bad wat ban tep ia ki briew ruh ki da pyrshah, haduh ban da wan ki pulit bad hap ban tep ha phyllaw iing.”

U Bah Donbok, u sordar jong ka hima maharam, u la kyntu ia ki bor jong ka aiñ ba kin peit lem ia kane ka jingiakajia, bad ba kin nym long tang ki nongpeitkai, hynrei ki ei ban shimkhia ia kane ka bynta hadien ba la iohi ia ka jing ia kajia bad ka jingiashoh iadat jong ki liang pyrshah khnang ba kum kane ka jingjia kan nym jia shuh nangne shakhmat.