Hadien ka jingbthei bom, bthei sa ka sorkar ha Lebanon

Hadien ka jingbthei bom ha ka nongbah Beirut, hynnin ka sngi, ka la bthei sa ka sorkar jong ka Lebanon bad baroh ki myntri jong ka sorkar, ki la hiar shuki noh.

Ka jingbthei ha ka nongbah Beirut, ka dei kaba la jubor bha, kaba la pyniap ia 160ngut ki briew bad hadien katei ka jingbthei, ka kynhun myntri, ba la khlieh da U Hassan Diab, myntri rangbahduh, ka la rai ban hiar shuki noh, kum ka jingsngew kitkhlieh halor katei ka jingjia ba sngewsih.

U Hamad Hassan, myntri ka koit ka khiah ka Lebanon, u iathuh ba ka jing iakynduh jong ka kynhun myntri, ka la rai ban hiar shuki noh baroh lang bad ban leit ai ia ka shithi iehnoh kam sha U President ka Ri.

Ka jingbthei ha Beirut, kaba la jia ha ki khyndiat sngi ba ladep, ka long kaba la jubor shi katdei, ha kaba 6 hajar ngut ki la mynsaw bad sa 3lak ngut, ki la duh ia la ki iing ki sem. Ka jing jubor jong ka jingbthei, ka long kumba shi bynta na ka san bynta jong ka jingbthei bom, ha Hiroshima.

La iathuh ba ka jingdon jong ki tiar siat, kiba haduh 2,750 ton, ka dei kaba ki nongialam jong ka sorkar Lebanon, ki la tip lpa, ha kaba wat U President ka Ri, U Michael Aoun, ula tip naduh mynshwa.