Tyngkhuh mawsiang ki balang Khristan

Bah RM Shabong

Ha kane ka jingkhang iing mane, kaba la iaid la san bnai tam, ki balang khristan, ki la ia kynduh ia ki jingeh bapher bad kawei na kitei ka long ka jing bym ioh shuh ban pynlong jing ia seng ha ka Sngi U Blei bad kumjuh ruh ha ki sngi pohia bad mynta, kaba ki pyniaid ka long noh da ka jing iaseng online.

Katei ka dei kawei ka mat kaba ha khmat bad lait nangta, ka don sa ka jingkhanglad ba kin ia leit sha ki jingiaseng ha ki shnong ki thaw bad kumjuh ia ki jing ia iaid riew nam lane ki procession, kiba la ju pynlong na ka por sha ka por jong ka kynhun katholik lane kaba lah ban ong, ba ha kum kane ka por ka jing ia pynrung balang ruh, ka la sahkut noh tdam bad kito kiba sngew im mynsiem, ki lah shu sngew ha ka jingim shimet lane ha la ki jong ki jong ki iing.

Ngin nym ia tih jylliew than ia kitei ki mat, hynrei kawei kaba ktah bha ia mynta, ka dei lyngba ki jingai nguh, kiba dei ka tyllong bah ia ka jingtrei kam jong ki balang Khristan, namar ba kitei kim ju ioh jing iarap na ka sorkar, hynrei ki ieng hi ha la ki kjat bad ka dei na katei ka jingai hun mynsiem jong ki dkhot balang, ba ki lah ban iarap ia kiba duk, ki iarap ia ki skul, ki iarap ia ki hospital, ki siew tulop ia ki nongtrei ba har rukom; hynrei mynta, lyngba kane ka jingkhang ia ki iingmane, ka jing ioh lum jong ki balang, ka la hiar shi katdei (khamtam ia ki balang ha ki nong kyndong) bad kumta, lada kane ka jingkhang, kan dang iai bteng, kumta kin shem shitom shibun, ba kin pyniaid ia ki kam bapher jongki, kiba ki dei ban pyndep shakhmat.

Kumba la ong haneng, ba ki Balang Khristan, ki shaniah beit ha ki jing ai nguh na ki dkhot jong ki Balang bapher bad kumta, haba ki jingai ki la sahkut, lyngba ka jingkhang iingmane, kumta katei kam ktah tang ia ki balang, kiba don ha ki shnong; hynrei katei khlem pep, kan ktah ia ka bor pyniaid baroh kawei, haduh ki bor kiba ha jrong duh jongki ha kylleng ka Ri Khasi Jaintia bad ka ban pynduh mynsiem ia ki nongtrei balang, ia ki nongsharai balang bad wat ia ki kam iarap jongki sha ki skul, sha kiba duk bad kiwei kiwei.

Ka khlam corona, ka la bam duh ia ka ioh ka kot jong ka pyrthei bad lada kane ka jing khanglad ban pynlong ia ki jingiaseng ruh, kan dang iai bteng ha ki bun bnai ban sa wan, kumta kan don ka jingktah ia ka jingsngew ba kynja mynsiem kaba don ha ki kynhun niam bapher bad nangta, kan ktah ruh shibun ia ki jingshakri jongki, ia ki para briew kiba donkam jingiarap.