Bitar U James ia ka jingkren U Laloo

Shillong, 27 Naiwieng:
U MLA ka NPP u James K Sangma u la khie bitar ia ka jubab jong u Symbud Myntri Rangbah ka jylla u Prof Roytre C Laloo halor ka jingjied ia ki skul ban ioh ia ka skhim ba la bei da ka Asian Development Bank (ADB).
Kane ka jingkhie bitar u James ka long halor kaba jingpan jing shai jongu na u myntri, balei ki skul na Garo Hills kim shym la shah jied
ha ka 1st Phase ban ioh na kane ka skhim.
U Myntri u la jubab, “Kim shah jied namar ba ka sorkar ka la thmu ban ai bun ha ka 2nd Phase”.
Kane ka jubab jong u myntri ka la pynbitar ia u James uba la ong ba kane ka rukom leh ka sorkar ka long thik kumba leh shiliang bad khein troin ia ka Garo Hills kum ka second class.
Ha ka jingshisha u la ong ba ka dei ban don ka jingiabhah lang kaba mar biang wat ha ka 1st Phase ruh ban ioh bynta lang na kane ka skhim
ba la bei da ka ADB.
Hynrei na ka liang u Prof Laloo u la pynksan nia da kaba ong ba kane ka jingleh ka long hadien ba la pynlong da ka ADB ia ka survey bad
katkum ki kyndon ba la buh.
Ka sorkr jylla ka la ioh ban bei pisa haduh 100 million dollar na ka ADB na ka bynta ban pynbha ia ki skul ha ka jylla.
Ha ka 1st phase, kiba ioh jingmyntoi ba kynthup ia 30 tylli ki skul,ka long tang ki skul ba hap ha East Khasi, Jaintia Hills, Ri-bhoi district, la ong u Symbud Myntri Rangbah bad bynrap ha ka 2nd phase, kin don 87 tylli ki skul kiban jied ban ioh ia kane ka skhim bad ka sorkar kan jied kham bun na Garo Hills.
Na ka liang u MLA u Saleng Sangma ruh u la kyrshan ia ka jingong jong u James ba ka dei ka jingleh shiliang jong ka sorkar ia ka Garo Hills. u la ong ba ka dei ban don ka daw kaba shongnia haba ka sorkar ka jied tang ia ki skul na Khasi Hills ne na Garo Hills, ym ban shu leh jhulum.
Ha kane ka por, u myntri rangbah u Dr Mukul Sangma u la ong ba ki MLA kim dei ban wanrah ia ka jingsngew iapher jaitbynriew namar ba ka sorkar kam shym la don kano kano ka jingthmu kaba kum kata hynrei ka hap iaid katkum ki kyndon.
“Ka jingpyndonkam ia ka ktien ba leh shiliang kan pynlong pynban ia kiwei ki bor ban shim kabu ia kane kaban pynsniew pynban”, la ong u Dr Sangma.