Ban bujli ia u president ka MPCC donkam ia ka jingmynjur jong ka AICC: Bah Vincent Pala

Shillong: U Bah Vincent H Pala, MP jong ka party Congress, u la ong ba ka jingbujli ia u president ka MPCC donkam ia ka jingmynjur jong ka AICC bad kane ka dei ka rukom pyniaid hapoh jong ka Congress.

Haba kren ha ki lad pathai khubor mynta ka janmiet, u la iathuh ba mynta ka sngi ka la don ka jingiakren bad u Genenral Secretary ba dei peit ia ka jylla, u Luizinho Faleiro ha kaba 18 ngut ki MLA na ki 19 ngut, ki la ia shim bynta ha kane ka jingiakren lyngba ka Zoom Meeting.

Ha kane ka zoom meeting jong ki MLA, ki la iakren ban pynkhlain ia ka party ha ka jingpynkhreh ia ka MLA election na ka bynta jong u snem 2023, ha kane ka jingialang uba khlem poi u dei u President ka MPCC bad u wei u MLA na Garo Hills, ha kaba baroh ki MLA ki la ia kren bad pynsngew ha u nongialam jong ka AICC.

Haba ia dei bad ka jingiakren ban bujli ia u President jong ka MPCC, na ka liang jong u bah Vincent u la ong ba ka dei ka jingshisha hynrei ban bujli ia u President don kam ia ka jingmynjur jong ka AICC. La ong ba kim dei tang ki san ngut ki MLA kiba la thoh ia ka shithi kiba kwah ban bujli ia u president ka la long 10 ngut na ki MLA.

Halor kane ka jingdawa na ka liang jong u Bah Pala u la pynshisha ba ka jingbym lah jong u President, u Dr C Lyngdoh ban don bynta ha ka party ha kine ki sngi ka dei na ka daw jong ka jingshitom jong ka kmie jong u, bad haba la iathuh ia kane ka jingeh ki MLA ruh kila pdiang.

Ha kane ka jingialang kila ia kren ban pynkhlain shuh shuh ia ki nongkitkam ka party kham tam ha kito ki jaka kiba ka party kam don MLA namar ba ki don kiba la mih kum u Bah Prestone Tynsong, Sniawbhalang Dhar bad kiwei haba ki mih na ka party ki nongkitkam jong ka party ruh ki mih lang na kine ki jaka, bad na kane ka daw ka donkam ban thung thymmai noh.

Na ka liang jong u Bah Pala, u la ong ba kam donkam eh ban long President MPCC ban long u MLA, kumba ka long ka party ka la leh bha ha kine ki elekshon kiba la dep, namar ka wan noh kane ka khlam COVID-19, mynta yn nym lah ban pynlong ia ka ilekshon ban jied ia u president ka MPCC.