Shillong: Ki nongialam jong ki kynhun jingngeit bapher, mynta ka sngi ka 10tarik u Nailar 2020 ha ka jingiakynduh lang kaba la long ha Archbishop’s House, Shillong, ki la pynlong ia ka Shillong All Faiths Forum (SAFF) –ha kaba u Bishop P Lyngdoh u long u President, Fr John Madur kum u Vice-President, Rev EH Kharkongor kum u Secretary, bad u Mr Naba Bhattacharjee kum u Joint-Secretary kane ka seng.
Ki jingthmu ba kongsan jong ka SAFF ki long ban kyntiew ia ka suk ka sain ha ka imlang sahlang, ki jingiasyllok hapdeng ki kynhun jingngeit bapher, ki jingialeit jngoh kylliang khamtam ha ki por ba mih ki jingdonkam ba kyrpang, ki prokram ban kyntiew ia ka mynsiem jong ka jingiatreilang, bad ka mynsiem jong ka jingsngewlem ha ka jingieit bad ka jingiakyrshan iwei ia iwei pat.
Ha kaba iadei bad ka jingplie ia ki jaka mane Blei, ka SAFF ka kyrpad ia ki riewngeit baroh ha ka jylla ban bat ia ki jingbthah jong ka Sorkar bad ban bud pyrkhing ia ki kyndon ba la buh.
Ka SAFF ka ai khublei ia kito kiba ia rakhe ia ka jingleh niam Janmasthami bad ka kyntu ia baroh ban kiar na ki jingialang paidbah, hynrei ban bud pyrkhing ia ki kyndon ba la buh na ka bynta ka jingkoit jingkhiah bad ka jingman bha jong baroh lang.
Phi don ban ong eiei?