Sdang biang ka Assam ban pyntrei ia ka surok PMGSY ha ki thain Balakhwa

Nongpoh:Ka Hynniew trep National Youth Front, Northern Region, ka la kynnoh ba ka sorkar Assam, mynta ka la bteng biang ban kyntur ia u pud u sam ka Meghalaya, kata da kaba sdang ban bteng biang ia ka jingpyntrei ia ka surok kaba la sdang na New Bala khwa sha Bernongsai, kaba dei ruh ka surok kaba la shah pynsa ngeh noh naduh ka por ba la mih ki huri hura, kata na ka jingieng pyrshah u Bah Micheal Warjri (Bam kwai ha dwar u Blei) bad uba dei ruh u Secretary ka Hima Nongspung.

Haba pyntip sha ki Lad Pathai Khubor, u Bah Donroy Kshiar, Asst. General Secretary ka HNYF, Northern Region, u la ong ba ka seng ka la ioh jingtip kaba tikna halor katei ka jingthmu ka Assam ban sdang pyntrei noh ia katei ka surok PMGSY, kaba la sdang na ka shnong Assam, nangta sha New Balakhawa bad shaduh Bernongsai.

U Bah Donroy Kshiar, u la iathuh ruh ba ka Assam ka la sdang ban pyntrei nyngkong ia katei ka surok ha u snem 2019, hynrei namar ka jingpyrshah da u Bah Micheal Warjri (Bam Kwai ha Dwar u Blei), ka la pynlong ia katei ka kam ba kan sahteng noh.

Utei u nongialam ka HNYF, u la pynkynmaw ruh halor ka jingshah shoh u Bah Micheal Warjri, ha kaba u la ong ba ka daw kaba hakhmat eh halor katei ka jingshah hiarthma ha ki paidbah, ka dei namar ba u pyrshah ia katei ka surok PMGSY bad kaba la pynlong ruh ia u Bah Micheal Warjri, ba un shah rah ha ki Pulit ka Assam.

Kumta haba iadei bad katei ka jingsdang ka sorkar Assam ban bteng biang ia katei ka surok PMGSY, na ka liang ka seng ka pyrshah jur bad dawa ruh na ka sorkar jylla ba ka dei ban tuklar mardor, namar ka nongrim kaba la pynlong ia ka seng ba kan pyrshah, ka dei namar ki sheptieng ioh ba katei ka jingwan pynpoi surok ka Assam sha katei ka thain, ioh kan dei pynban ka jingthmu ban klun lut ia baroh kitei ki jaka sha Assam, u la bynrap.