Trei shitom ka Umsohlait CMC, ban teh lakam ia ka khlam COVID-19

Nongpoh: Kan dei ka nuksa kaba bha na kiba bha tam ia kaba la pyni da Umsohlait Covid-19 Management Committee, ka shnong kaba don ha ki thain Mawhati ha Ri Bhoi District, namar ka jingtrei shitom ka jong ki ban tehlakam ia ka jingsaphriang stet ka khlam COVID-19.

Lyngba ka jingialam bastad da ki nongkitkam hapoh ka CMC, kaba la don bynta lang ruh da ki ASHA, ha kaba ka rukom treikam ban pyrkhing ia ka jingwan ki briew nabar, ka la long ha ka lynti kaba shai bad kaba lah ban pynsngewthuh ia ki paidbah.

Kawei na ki sakhi ba shai eh halor ka jingbiang ka rukom treikam da katei ka CMC, ka dei ha ki por ba don ki jingjia iap briew kaba hynne ka sngi hapoh katei ka shnong, ha kaba kitei ki CMC, ki da shim kyrteng lut ia baroh ki briew nabar bad ai ruh ka jingbatai sha ki, shwa ba kin leit sngewlem sha ka longiing ba iap.

Haba iakren bad u Bah Lawrence Chalam, Rangbah shnong ka Umsohlait, u la iathuh ba ka nongrim kaba la pynlong ia ka shnong lyngba ka CMC, ba kan shimkhia kumtei, ka dei namar ba ki don ia kata ka jingkitkhlieh ban tehlakam ia ka jingsaphriang ka Khlam COVID-19.

Haba batai halor ka jingpyrkhing ia ka jingwan ki briew nabar ha ka por ba don ba iap briew ha shnong, utei u rangbah shnong, u la iathuh ba ka CMC hi ka shim kyrteng lut ia baroh bad ki da kylli ruh ia ka jaka kaba ki la dep ban leit ban wan (Travel History), hadien kata pat ki sa batai ia ki ba ki dei ban leh ia ka Social Distance, ban deng ia ki Face Mask bad ruh ba ki dei ban saitkti barabor haba ki leit sha ka iing ba iap.

Shuh shuh, u la ong ruh ba ka shnong ka pyrkhing wat ia ki trai shnong, namar lada ki la wan na kano kano ka jaka kata shabar ka Distrik, ki dei ban pyntip sha ka shnong, khnang ba ka shnong kan ioh ban pyndap ia ka kyrteng ha Rejister bad ba kan pynsuk lada mih kano kano ka jingjia shakhmat.Nalorkata, utei u rangbah shnong ka Umsohlait, u la kyntu ia kito kiba leit bylla sha kiwei ki jaka, ba ki dei ban pyntip sha ka shnong ha ka por ba ki la wanphai, khnang ba ka shnong kan ioh ban leh ia kaba donkam bad kaba lah ban wanrah ia ka jingbha ia baroh lang.