Plie U MR, ia ka iing shong dorbar jong ka Mawkhar

Shillong, 23 Naiwieng:
U myntri rangbah ka jylla u Dr Mukul Sangma u la plie ia ka Multi- Facility Utility Centre Cum Cummunity Hall jong ka Dorbar Shnong Mawkhar ha ka jaka barim jong ka Khasi Jaintia National School Mawkhar, Shillong.
La synran lang da ka MLA ka thaiñ ka Kong Roshan Warjri kaba long ruh ka Myntri ka tnat ki kam Pohiing ka sorkar jylla, ka Myntri ka tnat pynroi sor ka kong Ampareen Lyngdoh, u Rangbah Shnong u Bah WHD Syngkon, u Deputy Commissioner ka East Khasi Hills u Sanjay Goyal IAS, nalor ki heh ki haiñ, ki nongshong shnong bad ki khynnah skul kiba la pynphuh pynphieng ia kane ka sngi.
U Myntri Rangbah kum u kongsan ula ong ba ka jingioh ban plie ia kane ka Multi-Facility Utility centre kan long kum ka jaka ai jinghikai ia ki nongshong shnong namar na kane ka jaka ki lah ban ieng ha la ki jong ki kjat bad ka ban ai mynsiem ruh khamtam ia ki samla kiba wad kam wad jam.
Ia kane ka centre la mang ha ka jinglut kaba T. 1.8 klur eiei.
“Ngi kwah ba na kane ka shnong kin mih ki kam kiba bha ban wanrah jingkylla ia ka jylla khamtam ka jingtrei jong ka seng kynthei Mawkhar,” ula ong u Dr Mukul.
Shwa ia kane, ka kong Ampareen Lyngdoh ka la ong ba ka Mawkhar mynshwa ka long hapdeng ha ki kam khaii bad ka jingkyntiew ia ki sap ki phong. “Ka tnat pynroi sor ka sngewbha eh ban ai ia ka shnong Mawkhar ban shna ia kane ka jaka lyngba ka Special Plan Assistant.
Kumjuh ka kong Roshan Warjri ka la pynpaw ia ka jingiaroh ia ka jingshim khia jong u Dr Mukul Sangma uba ula pynpaw ba un iarap bad mynta ka urlong shisha.
Ka kong Roshan ka pynpaw ka jingiaroh ia ka sorkar lyngba u Myntri Rangbah uba la mang pisa T .1 klur tam kum ka jingiarap na ka bynta ban tei ia kane ka Iing Dorbar.
U Rangbah Shnong ka Mawkhar u Bah WHD Syngkon ula ong ba ia kane ka jaka yn peit bad pyniaid da ka Dorbar Shnong katba ia ka jingtei yn pyntreikam da ka tnat Pynroi sor ka sorkar jylla bad lah ruh ban pyndonkam da kiwei pat ki Dorbar Shnong kiba don marjan bad ka Shnong Mawkhar.
Ha kane ka sngi la ioh ia ki jingrwai na ka Seng Kynthei Mawkhar Pyllun, na ka seng Samla Mawkhar bad kiwei pat ki jingialehkai kiba la pynbyrngia ia kane ka sngi kaba ki la ap tmang mynta la slem ba kan urlong.