Nang jubor ka corona ha India, sa 62 hajar ngut kiba iabit jingpang

Ka khlam coronavirus, ka nang kiew stet shi katdei ha India bad ha ki 24 kynta ba ladep, ka jingpang, ka la nang tam da 62hajar ngut ki nongpang.

Ha ka pyrthei, kiba ioh pang covid 19, ki la palat ia ka 19 million ngut bad kiba ioh pang ha India, mynta ki la tam sha ka 20lak ngut. U Rahul Gandhi, nongialam jong ka seng Congress, ula sangoh tyngeh ia ka sorkar U Narendra Modi, kaba dang sngap jar jar halor kane ka bynta bad U Rahul, ula pynkynmaw, ia kaei kaba ula pyntip lypa kham mynshwa, ba kane ka jingpang, kan lah bam tam sha ka 20lak ngut ha shwa ka 10tarik Nailar 2020.

Mynta kiba ioh pang, baroh ki la poi sha ka 20ngut tam ha India, katba kiba la jem na ka jingpang, ki long baroh 13.7 lak ngut. Ka India, ka wan ba lai, ha ka jingbun eh ki nongpang, lait noh ka United States bad ka Brazil.

Baroh kiba ioh pang ha ki 24 kynta ba ladep, ki don 62,538ngut. Haba khein lang ia baroh kiba ioh pang, ki don mynta 20,27,075 bad kiba dang shah sumar, ki long 6,07,384 ngut, katba kiba la jem na ka jingpang, ki long 13,78,106 bad kiba iap, ki long 41,585ngut, ong ka tnat ka koit ka khiah ka sorkar India.