Iehnoh myntri ka Kong Roshan namar ki kam pyntriem

Shillong, 21 Naiwieng:
Ka Kong Roshan Warjri ka la ong ba ka iehnoh ia ka kam myntri namar ba ka la sngew khia jur ia ka jinghiar ka suk ka sain bad ka jingkynrei ki kam pyntriem ha Garo Hills.
Ha ka jingpynlait khubor mynta ka sngi, ka la pynpaw ruh ia ka jingsngewnguh ia u Myntri Rangbah u Dr Mukul Sangma bad ka party kaba la bynshet ia ka kum ka myntri ha kane ka sorkar ha kane ka sorkar Meghalaya United Alliance (MUA -II).
Ka Kong Warjri ka la ong ba ka rai ban ieh noh ialade na ka kam myntri, kum ka dak ka jingsngew kitkhlieh ia ka jinglong jingman ha ka jylla.
Ka la ong ba ha kine ki 20 bnai ka la pyrshang tyngeh ban pynneh ban wanrah ia ka suk ka sain ha ka jylla. Hapoh ka jinglong nongialam u Dr Sangma, ka ong Warjri ka la ong ba ka la lah ban pynrulong ia ka jingiasoi soskular bad ka seng ANVC bad ka ANVC (B) katba ka dang iaid ka kam ha kaba iadei bad ka seng HNLC.
Hynrei ka jingjia ha kine ki sngi ha Garo Hills, ka la wanrah ia ka jing iaumsnam bad ka jing khlad jong ki mynsiem briew bad ki pulit ka la ktah ia ka mynsiem jong nga bad da ka jingsngew khia jur ia kane, nga tyrwa ban iehkam ia ka kam myntri”, la ong ka Kong Warjri ha ka kyrwoh ba la pynlait.
Ka la pynpaw ia ka jingsngewlem sha kiba haiing hasem jong ki pulit ba la khlad noh ha ka jingjia shah hiar thma ha ki lehnoh ha Garo Hills bad ia ki mynsiem jong ki riew lui lui.
Hynne ka sngi ruh kam shym la wan dorbar namar ba ka don kiwei ki kam bad kane ka jing iehnoh jongka, ka la paw haba u dkhot ka liangpyrshah u James K Sangma u la kylli la ka long kaba shisha ne em ba ka myntri kam pohiing ka la iehnoh. Halor kane, u Myntri Rangbah u la ong ba ka long kaba shisha hynrei na ka liang jongu, um pat pdiang ia kane ka shithi iehnoh kam jongka.
Ki tyllong khubor ki la iathuh ba ka kong Roshan Warjri ka la aiti ia ka shithi iehnoh kam ha u Dr.Mukul Sangma ha ka por 4:30 baje janmiet hynnin ka sngi bad ha shuwa katei ka la rung hapoh kamra u Dr.Mukul haduh laisien, bad dei ha katei ka por 4:30 baje ka la leit ban aiti syndon ia ka shithi risain.
La iathuh ba shuwa ba ka kong Roshan Warjri kan leit ban aiti ia ka shithi risain, ka la leit ruh ban ia kynduh shuwa ia u President ka MPCC u bah D.D Lapang bad hadien kata ka la leit sha kamra u Dr.Mukul.