U ba leit sha Rangthong PHC, un sa ngat ha ki kyndon ain

Shillong: U Director jong ka tnad ka koit ka khiah, u Dr Aman War haba iakren bad ki lad pathai khubor, u la ong ba ia u briew u ba la leit sha Rangthong PHC yn sa pyn ngat ia u ha ki kyndon jong ka ain, ynda u la ioh jingkoit na ka jingpang Covid -19.

U Dr War u la iathuh ba une u briew u dei u ba trei kum u nongai dawai ha Civil Hospital bad u dei u high risk contact na Civil Hospital, hynrei u la pynkhein ia ka jingleh quarantine bad u la leit buh ia ka lok kaba trei ha Rangthong PHC ha ka 4 tarik u Nailar 2020. U Dr War u la iathuh ruh ba une u briew shuwa ban yn leit phai sha ing ruh u la rung ha kawei na ka ATM kaba don ha Mawkyrwat bad myn hynnin ka sngi la lap ba une u briew ruh, u long Covid positive.

U Dr War u la iathuh ba ka liang ki briew jong ka tnad ka koit ka khiah ki dang pynlong ia ka jingwad ia ki briew kiba ia kynduh bad une u briew bad u la ong ruh ba lada ka lok jong une u briew ka long negative ka mut ba kan kham duna ka jingma.