Ka Andha Kanun ka don ha ophis DTO:Disparsing

Shillong, 20 Naiwieng:
Kham niar ban iohi ha nongbah Shillong ia ki kynthei kiba kamai Taxi , hynrei katkum ka ain wad jingtip paidbah, kaba u bah Disparsing Rani u la ioh na ka ophis u DTO bad Secretary, Regional Transport Authority, East Khasi Hills ki don haduh 40 tylli ki Permit ba katei ka tnad ka la ai sha ki kynthei ha kane ka District, kaba mut ba ki don 40 ngut ki kynthei kiba kamai Taxi ha nongbah Shillong.
Katkum ka hukum jong ka RTA sha ki kynthei ba ioh permit , ki permit ba la ai sha ki kynthei ia ki kali ruh dei ban niah hi tang da ki kynthei, bad ka rong jong ka kali ba ki Taxi ba ki kynthei kin niah kan dei beit tang ka rong jyrngam khleh rong lieh, bad kita ki kali ruh ki dei beit ban long tang kiba dang shu sei thymmai, kiba rim ym shah. Ka tnad ha katei ka hukum jong ka ka la batai ba ki Taxi ba niah da ki bym dei khasi ki dei ban ioh ia ka trading License na District council. Kitei ki hukum ki dei kijba ka RTA ka la pynmih ha ka Board meeting jong ka kaba la long ha u snem 2010.
Katba ha kaba dei pat bad ki Local Taxi kiba kamai shabar Shillong, ka RTI k ala pyni ba ki don 45 tylli ki permit, ka RTA kam shah ia kijtei ki kali ba kamai shabar Shillong ban kamai hapoh Shillong lait noh tang ba kin wan buh briew na kiwei pat ki jaka. La buh ain ba ka rong jong ki ka dei ban long ka rong Pink bad rong lieh. Lah ban kdew ba ha katei jingtip RTI kaba la ioh da u bah Rani ka RTA ka la pyni ruh ia ki nombar kali kiba la ioh ia kitei ki permit, 40 ki kali niah kynthei bad 45 tylli ki kali kamai shabar Shillong.
Shuh shuh ha katei ka jingpan jingtip, u bah Rani u la kylli hato naduh ka 7 tarik u nohprah, 2010 ka RTA ka la ju khot jingialang ne-em kaba la khot da u Secretary, bad kiei ki mat ia kren, ka jubab ba utei u rangbah u la ioh na ka RTA ka long ba ym pat ju khot jingialang naduh katei ka tarik ba la kdew, kaba mut la saw snem mynta.
Haba kren sha ki nongthohkhubor mynta ka sngi ha Shillong Press Club, utei u rangbah u la ong ba ha ka jingshisha ka don ka jingbuh thong ban ai permit 100 tylli ia ki kali ba niah kynthei bad 100 ia ki kali kamai shabar sor, hynrei katkum ka RTI ka la paw ba ki don tang 40 bad 45 tylli, katba kiba dang sah sa 60 tylli u la ong.
U bah Disparsing Rani u la ong ruh ba katkum ka ain ki kali kiba khia palat ia ka 3000 kilo ki donkam ban ioh permit, katba kat ki bus sawkhmut pat u la ong ba kim donkam permit bad haba u wad jingtip lyngba ka RTI shaphang kane ka ophisu DTO ka la jubab ba u dei ban wad jingtip na ka tnad Urban. U la ong ba kitei ki kali saw khmut ba don ia u nombar sorkar ML-01 ki don tang ka Insurance Private bad lada jia ba don ka jingjia sngewsih mano ban kitkhlieh ia ki passenger.
Utei u rangbah u la kdew ruh ba ban ialeh laisen niah kali, tang ban ioh ia ka Learner donkam shibnai, laisen ban niah Private donkam shisnem, katba haduh ban da ioh Professional ka donkam haduh lai snem bad kata lada iaid katkum ka hok, u la ong bad haba iaid pat da ka pisa kam bam por than tang da ki bnai la ioh professional. U la kynnoh ba ha ophis DTO ka hok ka la iap namarba treikam pisa, “Kata ka Andha Kanun ka don ha ophis DTO” u la ong.