Byrngem shah thngan ka Maitshaphrang, namar ka Ain shongkha

Shillong, 20 Naiwieng:
U Convenor ka Mait shaphrang u bah Micheal Syiem u la pynbna ba ka Maitshaprhang Movement ka la pynkhreh da ka jingshah thngan kaba khlem pud sngi, namar ba ka sorkar haduh mynta ruh kam patiaw ban pyn treikam ia ka Meghalaya Compulsory Registration of Marriage Act kaba la mynjur da ka Ing Dorbar Thaw-ain ha u 2012.
U bah Micheal u la ong ba mynta ka kynti ka Movement kan ym ai por shuh ia ka sorkar, hynrei lada kam lah ban thaw ia ki kyndon katei ka ain hapoh 48 kynta, ka Movement kan pynlong da ka jingshah thngan. Haba kren sha ki nongthoh khubor ha Shillong Press Club u bah Micheal u la ong ba ka sorkar ka la kular ban rah ia katei ka mat ha ka jingialang ki kynhun myntri bad ka la pyntip ruh ba ia ki kyndon hapoh katei ka ain ka la dep thaw, hynrei u la ong ba wat hadien ar tylli ki jingialang kynhun myntri ruh ym shym la ia kren eiei ia katei ka mat.
Ha kajuh ka por u la kynthoh ruh ia u Rev. N.S Phawa ne ia ka Khasi Jaiñtia Presbyterian Assembly kaba la kyndit thiah dier por hadien ar snem katba ki iohthiah lyngngai haba ka Law Department ka pan ia ki jingai jingmut bad ki jingsngew na ka Balang, ki sengbhalang, ki riewpaidbah bad kiwei kiwei haba ka tnat Aiñ ka dang pynkhreh ia ka Bill. “Katkum ka jingthoh kaba la pynmih da u Rev. N.S Phawa ne ka KJPA ka paw ba donkam ban rejistar ia ka shongkha shongman katkum ka aiñ,” ong u Bah Michael.