Ha ka NEP: Thmu ka sorkar India, ban nion da ka Hindi bad ka Sanskrit, ong ka Tamil Nadu

Ka Tamil Nadu, ka la ieng pyrshah ia ka ain pule puthi jong ka sorkar India, lane ka National Education Police (NEP).

U myntri rangbah ka Tamil Nadu, U Edappadi K Palaniswami, ula kren shai mynta ka sngi, ba katei ka Jylla, kan nym pdiang satia ia kaei ka ain bad u kwah ba u myntri rangbahduh, un ailad ba ka sorkar Jylla, kan pyntrei kam hi, da la ka jong ka ain ha ka pule puthi. U myntri rangbah, u pyrshah jur ruh ia ka ain kaba pyntreikam tang ia ki lai tylli ki kyntien, ha katei ka ain jong ka pule puthi ba thymmai, ha kaba u ong, ba katei kan ktah shibun ia ka jingsngew u paidlang ka Jylla Tamil Nadu.

U Palaniswami, ha ka kyrwoh mynta ka sngi, u kren shai ba ka sorkar Jylla, kan pyntrei kam beit da ka jinghikai kaba ar kyntien, lane kaba dei beit da ka ktien Tamil bad ka English.

Na ka liang ka seng DMK, ruh ka pyrshah jur ia katei ka ain pule puthi bad u nongialam jong katei ka seng, U MK Stalin, u kren shai ba ka jingthmu jong ka sorkar India, ka long ban nion jubor ia u paidlang ka Jylla, da ka ktien hindi bad ka ktien Sanksrit. U Stalin, u ong ba kane ka jingleh, ka khanglad ia ka bynta jong ka synshar paidbah, kaba la pyn khamti ha ka riti synshar jong ka ri India.