Khluit ka jingia nia u trai ing bad ki dkhot ka HYC, ba buh nongtrei da ki bar jylla

Shillong: Ki dkhot jong ka Hynniewtrep Youth Council Shillong City hapoh ka jingialam jong u samla Joy Phankon,Organising Secretary jong ka Nongthymmai Circle mynta ka sngi ki la leit ban jurip, ia ka wei ka ing ka ba dang shna ha Nongrimmaw, ha kaba ki nong trei ha kane ka ing kim dei ki trai jylla.

Ha kane ka jing jurip, ki dkhot ka HYC Shillong City ki la shem ba kine ki bar jylla kim shem la don ia ki kot ki sla kiba biang bad ka la don ruh ka jingpyneh jong ki trai ing, ban pyni ia ki kot ki sla jong kine ki nongtrei.

Ha ka jingia kawang ktien kaba shipor hapdeng ki Trai ing bad ki dkhot ka HYC, la wan tuklar U Rangbah Shnong ka Nongrimmaw bad ki pulit jong ka Beat House, bad na ka liang ki pulit jong ka Laitumkhrah ki la shimti bad kular ban shim khia ia kane ka bynta.

Haba iakren bad ki lad pathai khubor na ka liang u samla Joy Phankon Organising Secretary jong ka Nongthymmai Circle u la pynpaw ia ka jinglyngngoh bad pynrem jur ruh ia ka dorbar shnong jong ka Nongrimmaw, namar ba kum kane ka por ba dang jur ka khlam Covid-19 ha ka jylla ka dorbar shnong Nongrimmaw ka shah ia kine ki bar jylla ban wan ban trei ha kane ka jaka, ha kaba kane ka lah ban wan rah ia ka jingma ia ki shnong ki thaw.