45ngut shah rah ki samla, na Nan Polok ba iadih buaid

Shillong, 19 Naiwieng:
Mynta ka sngi 45 ngut ki samla pule ki la shah rah ha ki pulit katba ki dang iadih buaid ha Nan Polok. Na kine, san ngut ki dei ki kynthei kiba pule ha ki kolej bad ki skul. Ki pulit ki la rah ia ki namar ka jingleh khlem akor kaba ktah ia ki paidbah nongiaid nong ieng bad ruh ia ki khynnah khyllung ki rangbah rangsan kiba iaid kai ha kane ka jaka kaba don hapdeng ka nongbah Shillong.
Ia kine ki briew la leit ban rah sha thanad hadien ba la ioh ia ka jingujor na ki paidbah, la ong u SP ka East Khasi Hills u Bah Mariahom Kharkhrang.
“La rah 45 ngut ki samla kiba pule ha ki kolej, ki skul bad kiba la pep skul ruh ruh namar ka jingiadih buaid ha kane ka jaka jong ka Nan Polok”, la ong u SP bad bynrap ba na kine ki 45 ngut, san ngut ki dei ki kynthei.
Katto katne ki khynnah skul kiba dang iadih bad ka sopti uniphom, ki la shah rah ha ki pulit ba la thep ha bus sha Shillong Civil Hospital.
U Bah Kharkhang u la ong ba hadien ba la rah, la phah ban leh test sha Civil Hospital Shillong. “Ngi la phah ia ki ban leh tes ban ioh ia ka jingshisha bad yn sa leh ia kaba donkam hadien ba la ioh ia ka medical report”, u la ong.
Katkum ka jingong jong u Bah Kharkrang, ki pulit ki la lap ba ki kam bymman ki jyllei namar ka jingiadih pathar jong ki khynnah ki samla khamtam ha ki jaka paidbah kaba ktah ia ka burom ka ijot bad kane ka la ktah bad pynpyrkhat da kumwei pat ia ki nongwan jngohkai pyrthei haba ki wan sha kane ka jaka.