U khaw reshon sha u paidlang ka Jylla

Bah Monarch Shabong

Ngi don ha kine ki sngi, kiba eh shibun, na ka daw jong ka khlam coronavirus bad ha kiba kum kine ki sngi, ki don bun kiba sngewthuh bakla, da kaba ong ba uba jynjar u dei tang uba duk, lane uba donkam jingiarap na ki Bank lane na ka sorkar, u dei tang u nong bylla lane u nongdie madan; hynrei ha kaba kum kane ka khep, uba kham heh kam heh jam, u shah shyit na shibun ki bynta jong ka met jongu.

Uba duk, haba u thngan, lah ban iohi ba u thiah lyngkrang ha la phyllaw iing, ha la iing trep lane ba u mih shabar ban wad jing iarap na kiwei pat, hynrei uba heh kam, u trut ia la ka khlieh, u hylla bad u kyrkait briew bad ka daw ka long, namar ba u don shibun ki nong bylla, kiba ap thap na u, u don shibun ki tiar, kiba u hap ban sumar sukher, ban siew ram siew shah bad ha kum kine ki por, u lynniar u kyrthat namar ki jingeh kiba hajar jait u iakynduh. Kumba la kren haneng, kane ka jingjia kaba mynta, kam pat shym la jia satia, ha ka long rynieng jong ki nongialam jong kano kano ka seng sain pyrthei, kiba dang sah bad ngi mynta; lehse lada dei ha ka rta jong U LK Advani, Manmohan Singh bad kiwei kiwei.

Ha kaba kum kane ka kut lad, kaba lyngngoh, ka long ba ka jingiarap na ka sorkar India, ka thew tang ia ki nongbylla (kata ruh, tang shi powa ruh kim don), nangta ka sam khaw ruh tang sha kiba don ha ka kyrdan sam lane bam reshon, katba ka jing pyrkhat ban iarap lem ia baroh ki nongshong shnong, imat kam shym poi satia.

Ka sorkar, ka dei kaba la thaw da u paidbah bad kam dei kaba la thaw tang uba duk, lane kam dei kaba la thaw tang uba trei bylla shispah sngi, lane kam dei kaba la thaw tang uba bam khaw reshon bad kumta, ha kaba kum kane ka ia jong ka khlam, ka dei ban don ka jing pyrkhat kaba jynsur bha bad ha kaba kum kane ka por, ka dei ban long ka nuksa, ba ki MLA, ki minister, ki dei ban ieng lain ha khmat jong ki dukan reshon ban pyni nuksa, ba ym don ba heh, ym don ba rit, ym don minister, hnrei ngi iahap ha kajuh ka kyrdan.

Ka jing dawa ka BJP, ba ia u khaw reshon, uba wan na ka skhim jong ka sorkar India, dei ban sam sha u paidlang ka Jylla, khlem da thew tang ia uba don card reshon, ka dei ka jingai jingmut kaba bha tam bad ka sorkar jylla, ka la dei ban iakren bad ka sorkar India bad iarap, kat ia baroh lang, ha kaba kum kane ka hiran bah.