Ka jing pynkylla kyrteng ia ki tnat sorkar

Bah RM Shabong

Ka sorkar India, ka la pyn kylla kyrteng noh ia ka tnat human resource development (hrd) sha ka tnat Education lane ka pule puthi bad ka jingmut ruh ka kham shai, ban ia kaba kren kyllum, na ka kyntien ban tei ia ka longbriew man briew lane human resource.

Ha kine ki sngi, ba ka jing pynkylla kyrteng, ka dei ka mat, kaba donkam bha ban ioh nam ioh burom, kumta la shu sngew iahap hi, ba ka kyntien Education, kan long noh ka kyrteng kaba iahap, ha kine ki sngi.

Ka jingjer kyrteng ia ki tnat sorkar bapher, ka dei kaba la leh (imat) naduh ka por jong ka sorkar phareng bad kumta ngi iohi, ba kum ka tnat shna surok lane Roads Construction la ai kyrteng da ka Public Works Department (PWD), nangta ia ka tnat sam um, lane water supply, la ai kyrteng Public Health Engineering bad nangta ia ka tnat ri jingri lane Veterinary la ai Animal Husbandry bad ki don sa kiwei pat kiba ki kyrteng jongki, kim da iahap satia na ka jingtreikam.

Ka jingmut jong ka kyntien public works, haba shu ia kylla sha ka ktien khasi, kaba mut, ka jing ia trei kam jong ki paidbah bad kam pyni, ba ka dei ka tnat shna surok, nangta sa ka kyntien public health engineering, ka thew ia ka tnat kaba peit ia ka koit ka khiah bad kam iahap satia bad ka kyntien sam umbam umdih bad kumjuh ka kyntien animal husbandry ruh, ka don ia kyntien kaba kyllain bha, ban sngewthuh ba ka dei ka tnat kaba peit ia ki mrad lane ri jingri.

Lyngba ka jing pyn kylla kyrteng ia ka tnat Education jong ka sorkar India, lehse, ka la bha, lada kiwei ki jylla, kin shim nuksa, na ka bynta ban jer noh da ki kyrteng kiba beit ne iahap kyntien, ia ki tnat sorkar bapher, kumba long ka tnat Finance, kaba dei ia ka kam pisa, ka tnat Home, kaba peit ia ka shongsuk shongsain, lane ka tnat defence, kaba dei ia ka tnat iada ri, housing kaba dei ia ki kam shna iing bad ka tnat health, kaba dei ia ka koit ka khiah.

Ha kane ka juk computer, ha kaba ki kyntien, ki iai mih da ki hajar bad ki phew hajar tylli, kiba thymmai bad nangta, ha kaba ka rukom thoh bad ka rukom pyrkhat, ka iaid beit ha ka mat ka mat, kumta kan jin da la bha, lada ka sorkar India, kan shim ia katei ka rukom pyrkhat ia kito ki tnat kiba don ha ka jingpeit jongka bad nangta sa ki sorkar Jylla ruh, kin bud ryngkhi ia kiwei pat ki tnat sorkar.