KA SHNONG LAITKSEH, WEST KHASI HILLS DISTRICT

Da u Bah Philip Marwein

Na ka bynta kito kiba shong shnong ha Meghalaya ki bym pat tip ia ka shnong Laitkseh, kane ka don tang kumba 7 kilo metre shathie na Nongkasen kaba markhap bad ka Markasa. Kane ka shnong Laitkseh ka jngai tang kumba 26 km mihngi na Nongstoin. Kane ka long kawei na ki shnong baheh, ba paw nam bad ba la rim bha ha West Khasi Hills District. Ka don kumba 432 tylli ki tnum iing bad kumba 2731 ngut ki khlieh briew. Ki ba duk bad kiba kham tlot bor ha ka ioh ka kot ki don kumba 260 tnum iing. Kiba don Card Ration ki don kumba 347 tnum iing lada kheinlang ia ki Card AAY, PHH bad NFSA. Na ka Civil Supply bad Consumer Affairs jong ka sorkar ka shnong ka ioh tang 8151 kilo gram u khaw bad 928 litre ka umphniang sharak ha ka shi bnai. Kam ioh satia ia ka shini bad u Atta kumba ju ai mynshuwa. Ban bud-dien bha ia ka jingioh khaw bad umphniang sharak ha shnong ka don ka Village Vigilant Committee ban khmih halor ka jingsam hok ia ki mar ration (PDS items). Na ka bynta u bnai May bad June, ka shnong ka la ioh ruh ia u khaw ba 5 kg shi khlieh briew bad u dai u ba 1 kg shi tnum iing shi bnai ba dei na ka bynta ka Lockdown ba ai ei kyrpang da ka sorkar India ba lamkhmat da u Narendra Modi.

Ban jubab ia ka jingkylli na une u nongthoh, u Bah Hamly Thongni, u SORDAR jong ka Laitkseh bad u Bah Kainsing Kharrit, u SORDAR jong ka Upper Laitkseh ki la jubab shai kdar ba kham bun na ki nongshongshnong jong ki, ki dei ki nongrep bad ki mar-rep kiba kongsan ba ki rep ki dei u kba, u phan, u riewhadem bad u Biskot. Ki la iathuh ba la bun snem mynta u Biskot u long u mar-rep bakongsan (cash crop) u ba la wanrah ia ka jingkylla ha ka ioh ka kot. Ia u Biskot la wan thied bad kit na shnong bad na ki shnong ba marjan, da ki nongkhaii na Assam. “Mynta ka dor u Biskot ka la neh la katto katne bnai T.25/- shi kilo. Hynrei mynta la shitom ban pyniaid iew sha Assam ne shawei namar ba khanglad ka Khlam Covid-19. Hynrei ngi ngeit ba ka sorkar kan iarap ban thaw lad lem ban ioh shalan sha Assam bad kiwei ki jylla, kynthup sha Bangladesh”, la ong ki nongsynshar shnong kynthup ia u Chairman jong ka Football Tournament Committee Laitkseh Sports Club, u Bah G.J.L Sangriang.

Nalor ki nongrep, ki don ki nongtrei sorkar kumba 4 per cent, ki nonghikai skul kumba 24 ngut, ki nongkhaii kumba 2 per cent ei ei, ki nongbylla kumba 30 per cent, nongai dawai kynbat kumba 10 ngut, ki nongkhem kumba 8 ngut, nongri masi kumba 10 ngut, nongri sniang bad syiar kumba 80 per cent bad ki nongri blang kumba 5 per cent. Ki bym don khyndew lajong ki don kumba 11 tnum iing. Nangta ha Laitkseh kim don khlaw shnong, tang ki khlaw kur bad khlaw shimet. Kaba sngewtynnat ka long ba baroh ki tnum iing ki la ioh ding ilektrik.

Katkum ka jingiathuh jong u Sordar ka Upper Laitkseh bad u sordar jong ka Laitkseh bad kiwei ki riew rangbah bad longkmie, ka shnong Laitkseh ka la iohpdiang bun jait ki jingnoh synniang na ka sorkar bad na kiwei. Haka liang ka thoh ka pule ka Laitkseh ka la ioh jingiarap na ka sorkar na ka bynta 5 tylli ki L.P skul, 3 tylli ki U.P skul bad kawei ka Secondary skul. Na ka Health ka la buh kawei ka Sub-Centre bad 3 ngut ki Asha katba ka PHC pat ka don ha Nongkasen. Ka PWD ka la ai ia ka state road na Nongkasen-Laitkseh-Marngor-Phyllut bad na Laitkseh- Mawlaisyiem- Umkrem. Ka PHE ka la ai um kor hynrei kam biang satia, ha ki bnai ba rang bad kham bun na ki nongshongshnong ki ioh um na ki tyllong um lajong ha kper lane na ki shyngiar ne pung tong um ba la shna hi. Na ka Agriculture lah ban ioh ia ka P.M Kissan ka ba T.10,000/- uwei u nongrep kumba la kular da u Minister ka Agriculture bad ki la don katto katne ki nongrep kiba la ioh Power Tiller lyngba ka Subsidy.

Na ka Horticulture pat don tang khyndiat ngut ki ba la ioh Poly House bad ka shnong ka la ioh ia ka Pack House lane ka Godown ban buh ia ki mar-rep. Don ruh katto katne ki skhim ba la leh Convergence bad ka MNREGS. Don ruh katto katne ngut ki nongrep kiba la ioh ki symbai subsidy bad Sboh. Na ka Fishery ki la don tang khyndiat ngut kiba la ioh Skhim shna pung dohkha na ka Aqua Mission. Hynrei kine kim pat da seisoh ei ei. Na ka Animal Husbandry bad Veterinary ym pat don jingiarap skhim ei ei, lait noh tang tengkhat eh ki don kiba wan ai dawai injek ia ki jingri. Na ka soil bad Water Conservation ka la wanrah ia ka skhim Watershed, Springshed bad ka thung dieng. Na ka Forest bad Environment ym shym ai skhim ei ei ia ka shnong. Na ka Water Resources pat ka la ai skhim ring um rep ha Tiehiong bad Kynskong, ki ar tylli ki pyntha rep kba. Na ka Community Block Development la ioh shibun ki skhim kiba ym lah jer kyrteng lut, hynrei ka skhim kaba kongsan bad kaba la pynkylla dur ia ka shnong hi ka dei ka MNREGS ne ka skhim 100 sngi. Kane ka skhim ka long ka jingmyntoi bad jingkyrkhu shibun ia ka shnong.

Na ka liang jong ka Sports Department kam pat lah ban iarap shibun ia ka Laitkseh Sports Club lait tang ki tiar jong ka table tennis bad ki tiar ialehkai cricket. Na ka Social Welfare ka la ai jingiarap ia kiba Anna, ia ki riew tymmen, ia ki riew kynthei, ki longkmie bym don tnga shuh, ki tiar ialehkai jong ki khynnah bad ki khyllung. Na ka ICDS ka la ai peisa ban shna 2 tylli ki iing ICDS centre, ka ai ia ki marbam ba tei met ia ki khyllung khynnah- kum u khaw, dai, shini, ka dud, Shana, atta, shira bad kiwei kiwei. Ka la thung ruh ia 4 ngut ki Anganwadi worker. Na ka Tourism Deptt pat kam shym la ai ei ei ia ka Laitkseh haduh mynta. Na u MP u la ai skhim ban shna Building Secondary School bad ka jingkieng iaid kjat, na ki MLA la ioh skhim ban shna jingkieng iaid kjat, Dorbar Hall, CGI sheet, skhim repair iing bad na ki MDC la ioh skhim ban shna jingkieng iaid kjat, shna madan ialehkai. Na ki seng treimon sngewbha la ioh khaw na ka HYC bad na Ram Krishna Mission ha kane ka por lockdown.

Haba phai sha kiwei pat ki bynta ha shnong Laitkseh ki don 5 tylli ki kynhun niam, ka balang Presbyterian 261 tnum iing, Katholik 128 iing, All one in Christ 9 tnum iing, ka Balang U Blei (Ecclesia) 15 tnum iing bad ka Balang U Blei Meghalaya & Assam 19 tnum iing. Wat la ki kynhun balang ki bun hynrei kam don satia ka jingiakynat ne iashun hapdeng jong ki. Nangta, ka shnong ka la don bun bha kiba la pyndep ia ka Bachelor degree, khyndiat eh kiba la pyndep ia ka Master degree, don ruh khyndiat eh kiba la pyndep ia ka MBBA ba MCA. Don uwei u khun shnong u ba kyrteng u Norbertstar Marngar u ba la ioh ia ka District bad State Award ha ka kam hikai skul bad iwei ba la paw ha ka kam act phlim, I Kong Aibiang Marngar, ha ka phlim ‘Tang bad phi’ bad ‘u Mawnongrim’. Shuh shuh, napdeng ki khun shnong ba la noh synniang da u khaw na ka bynta kiba duk ha shnong u long u Bah Shemming Marngar u ba la noh synniang ruh ha kiwei ki bynta bad u Bah G.J.L Sangriang u ba la noh synniang radbah ha ka liang ban kyntiew ia ki kam Sports bad ha kiwei ki bynta hapoh shnong. Ka Laitkseh Sports Club ka la paw nam bha ha ka jylla ha ka kam sports dei namar ka jingnoh synniang jong Jong une u Rangbah.

Katkum ka jingiathuh jong ki Sordar, ki riew Rangbah bad ki longkmie, ka shnong Laitkseh mynta ka paw nam bha na ka bynta rep Biskot bad ka jingshalan ia u Biskot shabar jylla. Ka shnong Marngor ruh ka paw nam bha ha kane ka bynta. Ia u symbai Biskot la wanrah ha Laitkseh da u Babu Norbertstar Marngar na Mawkyllei ha ka snem 1958 hynrei la pynkhraw ia ka rep Biskot ha Laitkseh da u bah Nestar Lyngdoh bad hadien la kyntiew ia kane ka rep ha shnong da ki nongshongshnong jong ka Laitkseh hi. Nangta, kane ka shnong ka la paw bha ha ka jylla hadien ba la pynkhraw ia Open Laitkseh Football Tournament da ka Laitkseh Sports Club naduh ka snem 2015. Naduh kane ka snem haduh 2019 ki paidbah na kylleng ka jylla ki tuid sha ka shnong Laitkseh ban peit hun ia kane ka Football Tournament. Mynta ka snem ka la thut noh namar kane ka khlam Covid-19. Kane ka shnong ka paw bha ruh namar mynshuwa ka paw nam bha ha liang ba shna ia ki tiar nar kum ki wait bapher bapher, ki sdie, ki mohkhiew, ki sum, ki lyngka, ki khiew, ki pliang bad kawei. Ka la paw nam ruh ha ka shna ia ki jingdeng ksiar, thain ia ki jingthain babun jait, ka paw nam ruh na ka bynta ban shet ia ki jait jingbam tah sha bapher bapher da u khaw khasi paka khamtam u Pusaw, Pusyep, Putharo, Pumaloi, Pukhlein bad kawei kawei ki jait jingbam babang.

Ka shnong Laitkseh kaba hap hapoh ha HIMA Myriaw, ka paw nam ruh na ka bynta ka jingiaid beit iaid ryntih bad ba la synshar da ka suk ka sain hapoh ka shnong ka thaw naduh ki por barim haduh mynta mynne. Ka Dorbar shnong ka long borabor ha ba kut ka snem, man la ka snem. Ha kane ka dorbar la iashim bynta man la u khlieh jong ka iing bad ki dkhot jong ka Executive Committee jong ka shnong. Lada ka khlieh jong ka iing ka dei ka kynthei (longkmie) ma ka ka hap ban leit shim bynta ha ka dorbar shnong. Ki mat jingiatai sani ha ka dorbar ki long nyngkong eh ban pynsngew ia ka proceeding jong ka dorbar kutsnem ka ba la dep long, ban iakren halor ka General Report jong u Secretary, ka report na u Secretary jong ka integrated cooperative society, ki report na ki Sub-Committee bapher kynthup ia ka report na ka Development Sub-Committee, ka report na ka Vigilant Committee, ka Auditors’ Report, ka report na u Finance Secretary bad ban shim ia ki rai.

Ki heh ki hain kiba la poi-jngoh ia ka Laitkseh ha ki snem ba mynshuwa ki dei u Bah Martle Mukhim mynba u la long u Minister, ka Vice- Chairman ka Nehru Yuva Kendra, u Bah Prestone Tynsong, Dy. Chief Minister, u Bah Vincent Pala bad u Bah P.R Kyndiah, u Dr. Mukul SANGMA bad u Purno SANGMA, Speaker barim ka Lok Sabha bad Chief Minister barim ka Meghalaya.

Ka shnong Laitkseh ka dawa ban kyntiew noh ia ka Laitkseh Health Sub-Centre sha ka PHC bad ban kyntiew noh ia ka Nongkasen PHC sha ka CHC. Ban plie noh ia ka iew Mar-rep hajan Lad Umroi ban shalan beit sha Assam bad kiwei ki jylla bad ban ithuh noh ia u Biskot kum u mar-rep. Ba ka PHE kan pynbiang pura noh ia ka Laitkseh Water Supply Scheme ka bymlah ban pynbiang umdih ia ka shnong ha ki bnai rang tyrkhong.

Ka shnong Laitkseh ka la kiew shaphang ha bun ki bynta, ki nongshongshnong ki la shai bha bad ki la kham roi ha ka ioh ka kot, hynrei une u nongthoh u la lap ba ka surok na Nongkasen sha Laitkseh ter ter sha Marngor- phyllut shakhmat ka dang sniew palat bad kumjuh ruh ka surok na Laitkseh sha Mawlaisyiem shaduh Umkrem ka sniew bha bad ym pat siang rong naduh mynta. Kumjuh ruh ka surok na Nongkasen-Mawkaton ter ter shaduh Jaidoh ka dang sniew palat bad ka paw tyngkrein ba ka PWD Sub-Division Nongkasen kam kheinkor ban khmih ia kine ki surok kiba la rim bha. Sa kawei ka bynta ba ka Laitkseh ka dei ban leh ka long ban buh bha ia ki bui (registers) ban buh jingkhein thik pa thik ia ki nongshongshnong bad bun ki bynta ki ba donkam jong ka shnong ban suk haba iadei bad ki bor sorkar bad ki bor hima bad kiwei ki agency bapher bapher.