Nalor u MLA, iarap sa U MDC Jirang sha ki longiing baduk

Nongpoh: Wat la u MDC ka Jirang um da pynpaw paidbah eh ia ki kam babha kaba u la iarap ia ki paidbah hapoh ka Konstitwensi, hynrei ha ka jingshisha u Bah Victor Ranee, MDC ka Jirang, u la leh ia shibun ki kam babha bad kata ka long ban iarap ia ki paidbah kiba iakynduh jingeh ha kine ki sngi ba la leit noh, kata ha ka por ba don kane ka Lockdown ha ka ri hi baroh kawei.

Lah ruh ban kdew hangne, ba ka District Council, ka la ai ia ka bhah kaba mar T. 10 lakh sha baroh ki MDC ha ka KHADC, khnang ba ki MDC kin ioh ban iarap ia ki paidbah hapoh ka Konstitwensi bad khamtam eh ia kito kiba dei na ki longiing ba duk.

Haba iadei bad ki lad jingrap sha ki paidbah ka Konstitwensi, u Bah Victor Ranee u la ong ba kum u nongmihkhmat ki paidbah, u la leh ia kaba bha tam bad kata ban iarap ia kito ki longiing kiba donkam shisha ban ioh ia ki jingiarap.

U la ong ruh, ba na katei ka bha kaba la pynmang da ka KHADC, kum u MDC u la iarap kham bun da u Khaw, nalorkata u la ong ruh ba u la iarap da kiwei pat ki mar bam sha ki paidbah bad kata ka long katkum ka jingdonkam ki paidbah.