Kyrpad ki Shnong ban khangdam, tang ia kiba sah ki nongpang covid 

Shillong: Myn hynnin ka sngi ki nongialam shnong jong ki Shnong kiba la shah pynhap ha ka jingkhang dam (Containment area) ki la  pynlong ia ka jingialang bad u myntri ka tnad ka koit ka khiah, u bah Alexander L Hek, ka Deputy Commissioner jong ka East Khasi Hills District ka kong Matsiewdor N War bad u DHS u Dr Aman War ban iakren halor ki jingeh jong ki paidbah kiba sah ha ki jaka ba shah pynhap Containment area.

    Haba iakren bad ki lad pathai khubor, uwei na ki  nongialam shnong jong ka shnong Golf link u bah Michel Hek, u la iathuh ba mynta ka sngi ki la wan ban iakynduh ia u myntri ba dei peit ia ka tnad ka koit ka khia ban kyrpad na ka sorkar ba kan khang dam, tang ia kito ki kyntoit kiba don ki briew ki ba pang Covid -19.

    U la ong ruh ba kane ka jingpynbna khang dam, ia baroh kawei ka shnong ka wan rah jingeh ia baroh ki nongshong Shnong ha kine ki shong kiba ithuh kum ki Containment area  khamtam ia kito ki briew kiba hap ban leit bylla.

    Na ka liang u bah Michel u la iathuh ba na ka liang u Myntri ka koit ka khiah, u la kular ba yn sa bishar bad iamir jingmut lang bha bad ki bor ba dei peit halor kane ka bynta.