Bym bud ain ka EC JHADC; pyn sangeh ka NEC ia ka skhim Iawmusiang, ong U MDC

Shillong: U Ma Dawan Lyngdoh, MDC ka 10 Mynsngat Khanduli Constituency, u la pynpaw ka jingbitar halor ka jingbym tip ain ki nongialam ka Executive Committee, jong ka JHADC, hapoh ka jinglamkhmat jong u CEM T. Shiwat, kane ka jingbymtip ain ki nonglamkhmat ka JHADC Jowai, ha kaba ki nonglamkhmat ka Executive Committee, kim bym bud ia ki ain/rules ha ka jingpyntreikam ia ka Iawmusiang, namar hadien ba ka North Eastern Council (N.E.C) Govt. of India ka la lap ia ka jingleh stad ki nonglamkhmat ka council, da kaba pynkylla ia ka DPR jong ka iawmusiang, la hap pynsangeh shwa ia kane ka scheme haduh mynta da ki phew snem.

Ha kane ka nongrim kane ka EC kaba mynta hapoh ka jingialam u T. Shiwat, ka la leh thurmur ia ki katto katne ki ain, kiba ka EC kam dei ban iait lait kum ka jingpyntip sha u Local MDC jong ka Constituency hadien ka jingsam ia ki jingtrei sha ki contractor.

Hynrei kane ka EC ka la leh lyndet ia u Local MDC da kaba leh sop sop ha shwa ban ai ia kine ki jingtrei, bad kaba sngewsih ka long ba kum u nongmihkhmat kane ka constituency, ia ki jingtrei hapoh ka constituency la dep ban ai ha ka 27tarik Naitung 2020, hynrei na ka liang jong utei u MDC, u iathuh ba um ioh kano kano ka jingtip halor kane na ka ophis.

Kane ka jingbymtip ain ka EC ka lah ban ktah wat ia kane ka SAG Scheme ruh kumba jia ia ka iawmusiang, Jowai; namar ka jingbym iaid beit iaid ryntih ka jingtrei bad ka jingbym bud katkum ki kyndon kiba ka sorkar India, ka la ai sha ka council.

La iathuh ba ka scheme kaba la ai mynta sha ka constituency na ka Special Assistance Grant (SAG) ka long T. 38,00,000/- bad kaba la dep ban submit kumba la ioh copy na ka Chief Engineer sa T.12,00,000 kaba ka EC kam pat khot tender haduh mynta.

Ia kane ka 38, 00,000/- la sam sha ki 8 tylli ki shnong kumne harum:-

1. Mokoiram village Rs. 5,00,000/- tyngka ban shna school building
2. Khanduli village Rs. 5,00,000/- tyngka ban shna school building
3. Ladmyngngor village Rs. 7,00,000/- tyngka ban shna madan football
4. Umjalisiaw village Rs. 5,00,000/- bad Rs. 1,00,000/- tyngka ban shna school building bad ban shna umdih.
5. Mynsngat village Rs. 6,00,000/- tyngka ban shna school building
6. Namdong – A village Rs. 7,00,000/- tyngka ban shna view point
7. Thadmynri village Rs. 1,00,000/- tyngka ban shna umdih
8. Madanrtiang village Rs. 1,00,000/- tyngka ban shna umdih
   Na ka bynta ka Rs. 12,00,000/- tyngka pat T. 6,00,000/- tyngka na ka bynta ka shnong Namdong B village bad Rs. 6,00,000/- tyngka na ka bynta ka shnong umshangiar village.