Kynjah jar ka Umsning na ka jingphah khang dukan, ka UTD

Nongpoh: Hadien ba la iohi ba ka la don ka jingleh lymmuh kaba palat da ki nongshong dukan ha ki thain Umsning hi baroh kawei, ki Nongialam ka Umsning Town Dur bar, ki la pynmih syndon da ka hukum ban khanglut ia baroh ki dukan kiba don ha ki shnong kiba hap hapoh ka Umsning Town Durbar.

Haba iadei bad katei jingkhang lut ia kitei ki dukan, u Bah A. Makdoh, Chairman ka Umsning Town Durbar, u la ong ba katei ka rai ban khanglut ia baroh kitei ki dukan, ka dei ka rai kaba la rai lang da baroh ki nongialam shnong kiba hap hapoh ka Umsning Town Durbar bad kata ka long ban pynsngewthuh ia kito ki nongshong dukan ba kim dei ban ialad na ka jingialum bun briew ha ka shi jaka bad sa kawei pat ka long ba khnang kitei ki trai dukan kin ioh ban pynkhuid ha la ki dukan kaba ki shong.

U la ong ruh ba katei ka jingkhang ia kitei ki dukan ka long tang arsngi, kata ha ka 29 bad 30 tarik mynta u Bnai bad lyngba katei ka hukam khang dukan, la iohi ba ka thain Umsning ka la kynjah hi jak bad ym shem la iohi ba kawei ruh ka dukan ba kan plie.