Khang ia ki jaka ba don ki nongpang

Bah RM Shabong

Ka khlam coronavirus, ka la don ha ka Jylla, la san bnai kynthih bad hadien ka san bnai, ngi iohi ba ka sorkar Jylla, ka la sdang ban sngewthuh bad kata ka long ba ki kyntien jong ka red, ka orange, ka green bad kumta ter ter, ki la duh noh, hynrei mynta la pyndonkam, da ka kyntien, kaba ki ong containment zone lane ka jaka, kaba don jingpang lane ka jaka, kaba don ha ka jingpakhang shnong.

Ka kyntien containment, ka thew beit ba kitei ki dei ki jaka, ba don ki nongpang lane ba ki don kiba suba don jingpang bad ia kitei ki jaka, ka dei ka kamram jong ki doktor ban wad ia kiba pang, ban sumar ia ki bad ban pyllait na ka jing iabit na kiwei pat. Kum ka nuksa, ba lada khang ia ki 26 tylli ki shnong ha ka nongbah Shillong, hynrei ki don sa bun phew tylli, kiba dang ioh ban ia iaid ia ieng, ia leit ia wan bad kumta ter ter bad ia kitei kam khanglad ba kin leit trei sha kper, ba kin leit sha ki jingleit ba donkam bad kumjuh shathain Mawngap ruh, la khang tang ia kawei ka shnong ha Kreit bad kiwei kiba marjan, ki ioh ban ia rung ia mih.

Ha ki bun bnai ba ladep, ngi la pynduh ia ka iaid ka ieng jong u paidlang ka Jylla hi baroh kawei, da kaba shu set kut ia ki phew lak ngut kylleng ka Ri Khasi Jaintia, na ka bynta jong uwei uba iap bad 3, 4ngut kiba pang; hynrei mynta, haba ki la don kumba 500ngut kiba pang, ngi la nang ban ker kut tang ia kito ki jaka kiba don jingma.

Halor kane ka mat, ngi hap ban ai nguh let ia ka sorkar Jylla, ba kam shym la set slung ia u paidlang jong ka Ri, uba don sha Jaintia Hills, sha West Khasi Hills, sha Ribhoi bad kumta ter ter bad ka nuksa kaba itynnad shibun, ka long ba ha kane ka khang shnong, kaba lai sngi ruh, ki la khang tang ia ka nongbah Shillong, katba kiwei pat ki ioh lad ban ia leit ia wan. Ka jing pynbeit, ka long kaba bha bad ka sorkar, ka dei ruh ban wad pynstet ia kito kiba pang bad ban rah ia ki, sha ki jaka sumar ba ka khang shnong, kam dei ban neh slem bad ba kan ktah ia ka kamai kajih ki riew paidbah.

Kam dei tang kata, ka la dei ruh ia ka sorkar, ba kan ia trei lang bad ki shnong, ba kan nym don ka jing pyndon bakla ia ka kyntien pakhang shnong, ba kan pyndik ia ka leit ka wan jong u luk u lak bad haba don ka jing donkam ruh, ba ki dei ban ia syllok bad ki bor pyniaid ha ki Block lane ha ka District.