Shah kem 2 ngut ki ANVC-B, bad u nongiarap ka GNLA

Shillong,16 Naiwieng: Lai ngut ki ehrang kaikhlaw bad ar ngut ki nongiarap lehnoh ki la shah kem ha ka jingleit khynra lehnoh jong ki shipai Army bad ki pulit ka Meghalaya bad Assam.
Ha ka jingleit khynra jong ka Army’s Red Horns Division bad ki pulit Meghalaya, ki la ioh kem 2 ngut ki Achik National Volunteer Council-B (ANVC-B) bad uwei u nongiarap jong ka ha North Garo Hills, katei ka ingjia ka la jia ha ka sngi saitjain jong ka taiew. Na kitei la ioh kurup kawei ka pistol 9mm, 2 ki pistol 7.65mm bad ki kuli. La kynnoh ba wat hadien ka jingiasoi soskular iasuk bad ka sorkar, hynrei ka jingpyntriem ki dkhot katei ka seng ha ri-lum Garo ka dang iai bteng haduh myngta kynthup ki kam rahbor, bad ki lute.
U nongai ktien ka tnad iada ri, u Lt Col Suneet Newton, u la ong ba ia katei ka jingkhynra la ioh kem ruh ia u nongiarap ka Garo National Liberation Army (GNLA) na Goalpara District.