Hukum ka Sonia ia ka MPCC ban phah kaiphod ia ka Deborah

Shillong, 13 Naiwieng:
Ha ka taiew ban wan ka Meghalaya Pra desh Congress Party (MPCC) kan phah ia ka kaiphod sha All India Congress Committee halor ka jingshah kynnoh ka myntri sorkar kaba bat ia ka tnad Social Welfare ha ka juh ka por ruh kaba dei ka Working president ka MPCC ka Deborah Marak ba ka pyndonkam da ka GNLA ban jop ha ka elekshon MLA kaba dang shu dep shen ha u 2013. Ki tyllong khubor ba iajan bha bad ka seng Congress ki la iathuh ba namar katei ka jingshah kynnoh ka ka MPCC ka lah ruh ban weng noh ia ka kam Working President.
U President ka MPCC u bah D.D Lapang u la ong ba shen ha kane ka taiew ban wan ka MPCC kan phah ia ka ripod ryngkat ki kot ki sla sha ka AICC, u bah Lapang u la iathuh ia kane sha ki lad khubor hadien ba u la ia kynduh ia u myntri rangbah ka jylla u Dr.Mukul Sangma mynta ka sngi. Katei ka jingiakynduh u bah Lapang ia u Dr.Mukul la ong ba ka dei ba u kwah ban pyntip sha u kum u myntri rangbah ba ka AICC ka kwah ban ioh ia ka ripod ha kaba ia dei bad ka jingshah kynnoh ba ka Deborah ka pyndonkam bakla da ki bor jong ki seng lehnoh. U la ong ruh ba pyrman jong ka nane ka jylla u la ia kren bad u, bad ha ka jingiakren u pyrman u la pyntip sha u ba ka President ka Congress ka Sonia Gandhi ka la hukum ia ka MPCC ban phah ia ka ripod halor katei ka kam.
U bah Lapang u la iathuh ruh ha ki lad khubor ba u la dep ia kynduh ia ka Deborah ban ia kren halor katei ka kam, bad ha ka jingiakynduh ka la ong ia u ba kam kwah ban ia kren shabar; namar ba katei ka kam ka la don ha kashari bad kaba sah ka long ha u nongiasaid ain jong ka. Lah ruh ban kdew ba ka ing bishar CJM ka la khot hajir ia ka Deborah ba kan leit mih sha ing bishar ha ka sngi thohdieng, bad ka la ong ba kan ym sngew lehrain hynrei kan leit ban mih sha ing bishar.
Haba la kylli hato katei ka jingshah kynnoh ka Deborah ka ktah ne-em ia ka burom jong ka Party, u bah Lapang u la ong ba bun na ki para nongtrei Party ki la pynpaw ka jingsngewkhianaba katei ka jingshah kynnoh kam shym la ktah tang ia ka shimet , hynrei ka ktah ruh ia ka sorkar bad ka party kumjuh namarba ka dei ka Working president jong ka Party. U bah Lapang u la ong ba katei ka kam hap ban pynshisha hakhmat ka ain, hynrei ia mynta pat u ong ba kaba kongsan ka dei ka jingpeitngor ka AICC kaba hap ban ioh sngew na ka liang ka sorkar kaba yn pyntip hi da u myntri rangbah.