DA U JEREMIIA DKHAR
Ka Ri Khasi jong ngi ka dei kawei napdeng ka ri kaba itynnad tam namar ka don ia ka Mei-mariang kaba itynnad, ki soh ki paid kiba thiang, ki kshaid kiba noh rymphum,ki wahduid kiba shngiam ban dih, ki syntiew ki skut kiba phuh man ka aiiom,ki jangiew jathang kiba bang, ki dieng ki siej ,ki lum ki wah kiba pyniphuh pyniphieng bad ki marpoh khyndew ba laiphewjait ban pynjawdud ia kiwei ban tuid sha ri-lum jong ngi ban kamai spah bad thap pynjot wat ia ka ri. Ia kane ka jingitynnad la pynwandur da u nongthaw kum ka ri kaba tuid da ka dud bad ka ngap kaba kham pher na ki ri ka pyrthei.
Ka ri khasi ka dei kawei ka ri kaba riewspah bha ha ka ktien,bad ha ka kren ka khana, ha ka put ka tem, ha ka rwai ka siaw,ha ka rukom rep rukom riang,ha ka trei ka ktah,ha ka bam ka dih,kiba dei ki kolshor u mynbarim. kawei ka thain ka ia pher na kawei pat ha ka sur kren bad ha ka rukom kynud bad kynnoh ia ka ktien na kawei pat hynrei lada ngi bishar bniah bha kaba bun hi ka iasyriem beit sha ka ktien kmie ne ktien tynrai khasi. Kane ka pyni ba ha ka jaitbynriew hynniewtrep jong ngi ka don ia ki thain kiba pher kiba pher ha kaba ka rukom im,ka shet ka tiew bad ha ka kolshor ka iapher na kawei ka thain sha kawei pat.
Ka jingiatan tyllai ia ka burom ne ka khwan burom ha ryngkat ka mynsiem bishni hapdeng ki para nongialam jong ngi la ha ki kam saiñ hima sima,ha ki kynhun sengbhalang,ha ki kynhun niam balang, ha ka dong ka thain, ha ki shnong ki thaw,ha ki jait ki khong, ha ka ing ka sem, ka dei kawei kaba ma bha ba ngin sa shah rem noh ha kaba bun ki jingialeh thma na ka bynta ban ioh ia ka stieh iada na ka bynta ka ri baieid jong ngi.
Ki nongialam kiba stad, kiba iohi jngai, kiba ieid hok ia la ka ri kum u Tirot Sing Syiem, u Kiang Nongbah bad u Wickliffe Syiem kim ju kwah ne khwan burom hynrei ki lum ki lang ia ki paradoh parasnam ban ia pyrkhat sani lang. Ki klet noh ia ka burom ka ijot ialade pynban ki wad lad wad lynti kumno ban jop ia ka thma ban iada ia la ka ri baieid jong ngi. Ki shim ia ki symboh pyrkhat jong ki para nongialam bad ki kyrshan ia kaba dei,kim ju wohnia wohdong,kim ju bishni ne puhuiñ,thap pynjot,pyniap bad shetkylla para ri hynrei ki ai mynsiem ban ieng ha ka nongrim ka hok khlem kynrandien.
Katba nang mih ki sngi ki por ka jingbishni ka nang khlaiñ bor.Ka rung ha ki dohnud jong ngi ban thap pynjot ia la ka ri. Ka len lade ka la jah noh ka don beit sa ka malade. Ka jingpyrkhat ia ka jingmyntoi lang ka la duh noh ka don beit sa ka myntoi shimet bad ka klet noh ia la ka ri kaba kdup ieid ia ngi. La dei ka por ba ngin iatylli bad bret noh ia ki symbai jong ka jingiabishni ban kyntiew joit sha jrong ia la ka ri jong ngi.
Ka khwan myntoi ha ka bishni ka pynjot bad ka pyntlod bor ban nang kham pynjot shuh shuh ia ka ri baieid jong nga jong phi para ri. Namarkata, ia ngin bret noh ia ka khwan burom bad sdang noh ban iatylli para ri ban iatreilang bad iengtyllilang bad ban dawa lang ban ioh ia ki stieh iada ia la ka ri baieid thep mynsiem jong nga jong phi ko ki para ri.
Para ri khatduh iawai! Ka ri-khasi ka dei ka ri baieid thep mynsiem jong nga jong phi. kynmaw ba ngi dei ban ri sumar ia la ka ri ym ban die tad dor ha ki poiwir shisngi tang ban myntoi shimet khlem da pyrkhat sani ia ki longdien ki khun ki kti jong nga jong phi.
Kynmaw paradoh parasnam ba ka ri jong ngi ka donkam ia nga iaphi ban pynioh bad dawa noh mardor ia u stieh iada ka ri jong ngi lyngba ka jingiatylli bad iasnohkti da u Khyriem, u pnar, u bhoi, u war, u maram, u Lngam ba ngin ia treilang kum ki paid khasi baiar.
Phi don ban ong eiei?