Shillong:U CEM ka KHADC u bah Titos tarwell Chyne, u la iathuh ba ha ka jingialang jong ka EC kaba la long myn hynnin ka sngi, ki la shim ia ka rai ban ym ai jing mynjur na ka bynta ban shna ia ka lynti rel, ka ban shna na Byrnihat shaduh lailad Ri Bhoi District.
Haba iakren bad ki lad pathai khubor, u CEM ka KHADC u bah Titostarwell Chyne, u iathuh ba ki la ioh ia ka shithi ha ka 9tarik u Naitung 2020 ba na ka tnad Transport kaba la thoh lyngba ka Deputy Commissioner jong ka Ri Bhoi District, ban pan biang ia ka jing mynjur na ka KHADC ha ka jingiadei bad ka lynti rel ha Byrnihat.
U iathuh ruh hadien ba ki la mih bun ki jingpyrshah na ki paidbah bad na ki sengbhalang ia ka jingthmu ban shna ia ka lynti rel bad kumta ia mynta hi ka KHADC kan ym pat lah ban ai ia ka jingmynjur bad u la iathuh ruh ba ki pan ia ka jingmynjur, na ka bynta jingpan jaka (land acqusition) na ka bynta ka New BG Railway Line na Byrnihat shaduh Lailad.
Ha kane ka jingialang la shim ruh ia ka rai ban mang pisa kaba long T. 36 hajar ia ki skul bym ioh jingiarap na kum ki skul Mission ki bym ioh jingiarap na ka sorkar. U bah Titostarwell u la ong ba ha ka dorbar mang tyngka kaba la dep, ym shem la don kano kano ka jingpynmang Pisa na ka bynta ka tnad pule puthi jong ka KHADC, hynrei mynta ka sngi ka la shim ia ka rai ban ai jingiarap na ka KHADC na ka bynta ki skul ki bym ju ioh ki jingiarap na ka Sorkar.
La iakren ruh halor ki iew kiba hap hapoh ka jingpeit jong ka KHADC kum ka Iew Byrni hat bad Laitlyngkot ban kham pynbha bad pynheh,ha kaba iadei bad ka iew ka ba la thmu ban buh ha Mawlai Mawroh, u CEM u la iathuh ba la aiti ha u EM Incharge ban leh ia kaba donkam bad kane ka tnad kan khmih bniah bad ban leh ia kaba donkam khnang ba kan ym don kano kano ka jingsngewthuh bakla na ka paidbah khamtam na ka Mawlai Town Dorbar.
Halor ka tnad Forest ban kham peitbniah halor kane ka bynta la thaw ia ka tnad ba thymmai ka Social Forestry Branch; kane ka tnad ka long ban peit bniah halor ban thung dieng ban pynroi ia ka kam thung dieng ban pynshlur ia ki community forest bad ki law adong bad ban ai jingiarap na ka Council kane ka tnad ka long ruh ban ai ka jingiarap bad ban iada ia ka mariang.
Phi don ban ong eiei?