26 Naitung, ka Sngi jong ka Jingiaduwai bad shah jingit lang na ka bynta ka jingpynkhiah U Blei

Shillong: Da ka jingiaibteng ka jingban jong ka khlam Covid19 ha ki shnong bad ki kyntoit jong ngi, ka SKJCLF ka khot ia baroh ki riewngeit ban iashimbynta ha ka “Sngi jong ka Jingiaduwai bad shah jingit lang na ka bynta ka jingpynkhiah U Blei” ha ka Sngi U Trai 26tarik u Naitung 2020 naduh 6baje mynstep haduh 6baje janmiet. Yn sa pyni ha ki TV-shnong ia ka jingiaseng kaba kyrpang ha ka por 7baje janmiet. Ha kano kano ka por ha kane ka sngi, ki riewngeit bad Balang ki lah ban iashimbynta ha kane ka prokram da kaba kyntiew ia ki jingduwai ba kyrpang na ka bynta ka jingisnei bad jingpynkhiah U Blei – ha ka jingialong kawei ryngkat bad ki riewngeit kylleng ka ri jong ngi. Na ka bynta kito ki riewngeit kiba don ka jingpynkynduh bad jingkhot ban duwai bad shah jingit, ki lah ban leh ia kata ha kano kano ka por kaba biang ia ki.

Ka Forum ka sngew ba kum ka Balang bad ki briew jong U Blei, la khot ia ngi ban wad ia ka khmat jong U bad ban duwai. Ha ka por kaba donkam ia ngi ban ia pajih iwei na iwei pat ha ka doh, ka long kaba donkam eh ba ngin don ka jingiajan hapdeng jong ngi ha ka mynsiem, da kaba ngi ia duwai bad ia long lang ha ki por jong ki jingeh bad jingialeh.

“Ngi pynpaw ki jingsngewnguh bakhraw ia kito baroh kiba la pha ia la ka jingim, don ruh napdeng jong ki ba la khlad noh ha kaba ai ia ka jingshakri jong ki. Ngi phah ia ki jingsngewlem sha kito ki longiing longsem kiba la duh noh ia la ki baieit ba thoin ha kane ka khlam, bad ngi duwai na ka bynta ka jingpynkhiah bad jingisnei U Blei ia kito baroh kiba la shah ktah ha une u khniang jingpang” ong ka kyrwoh.

“To ngin duwai ba ka jingsaphriang une u khniang jingpang kan sangeh noh, bad ruh na ka bynta kito baroh kiba don hapdeng ka jingsumar bad kiba don hapdeng ka jingshong pynkyrpang jong ki na ka bynta ka jingiada ialade bad ia kiwei. Ngin duwai na ka bynta ki nongtrei ka koit ka khiah bad kito kiba pha ia la ka jingim na ka bynta ka jingshakri ha kine ki por”. Ka kyrwoh ka ong shuh shuh ba yn duwai na ka bynta ka Sorkar bad ki bor pyniaid baroh ban ai ia ka jingshakri jong ki da ka jingtrei hok, ka jingstad, bad ka jingryntih jong ka ain; ha kajuh ka por ruh ba kin don ka jingieit ia ki briew bad ki shnong ha ka ri jong ngi bad ha kylleng ki jaka de bad yn duwai na ka bynta ialade ba ngin lah ban ai ka jingshakri kaba bha tam, ban ia peit lem ia ka jingdonkam jong kiwei, ban iarap ia kiwei da ka mynsiem kaba kylluid, ka mynsiem kaba shlur kaba dap da ka jingstad bad ka jingieit.