Ka jingjia ha Ribhoi, kaba la wan jia da ka bor maia, ong u heh ka Sengbah ki Nongshat Nongkhein

Shillong:Shibun ki jing iakren ki la mih ha lynti syngkien ha kaba ia dei bad ka jingjia kaba la jia dang shen eh ha ka shnong Umtrew kaba don ha Ri-Bhoi District ha kaba ka la don ka jingjia kaba phylla kaba ki maw, ki phan  ki hab ha kawei ka ïing briew kaba la jia ha ki por mynmiet. Ki trai ïing kim tip naei kitei ki maw ki phan ki wan bad ki sah ha ka dum ka lyngngoh namarba kim lap dien satia watla ki la ïa ap la ia wad ia ki sabut.

Ka la mih ruh ka jingiakren ia pasiaw lynti paralok hapdeng ki paidbah ba ka jingjia kaba la jia ha ka shnong Umtrew ka lah ban dei ka kñia ka khriam ne ka ai ksuid ai khrei katkum ka jingngeit jong kiba don ka niam Tynrai.

U nongthoh khubor u la ioh ban ia kren lyngba ka  telephone bad u President ka Sengbah Ki nong shat Nongkheiñ u bah Pran Jala halor katei ka bynta kaba la jia ha Ri-Bhoi. U bah Pran Jala u la ong ba katei ka jingjia ha Ri-Bhoi ka dei ka jingjia kaba la jia da ka bor maïa bad kam dei ba wan buh ne ba wan kawang mano mano hynrei ka dei ka dak ka shim kaba pyni ia ka jingjot jong katei ka longïing namarba ka la don ka daw tynrai kaba ki long mynta kim don jingtip eiei.

Hynrei u la ong ba ka jingpyni ia ka dak kaba bah eh namarba katei ka longïing kan ioh ban ia said bad ban ia suk bad ban pynjemnud lyngba katei ka dak. U la ong ba ki donkam ban leh da ka jingduwai kaba kyrpang bad kaba janai bha ban lait na kiei kiei kiba sniew bad ia kane ka jingduwai ruh hap ban leh da ki briew kiba don ka iktiar ka talen ym da kito ki briew kiba shu leh men leh nongduwai ialade.

Une u nongthohkhubor u la ioh ruh ban ia kren shai bad u bah Pran Jala namarba bunsien ki ju mih ki jingkynthoh ia ka jingngeit Niam Tynrai da kaba ong ba ka dei ka jingngeit biej hynrei haba ia kren ia kane bad utei u rangbah nongshat Nongkheiñ u la ong ba um beiñ um khoh iano iano hynrei kiba kwah ban tip ia ka tynrai ki dei ban leit ia kynduh markhmat bad u bad kam myntoi ban ia kren ha kotkhubor namarba ka shu long ha lyer tang ban tip u paidbah, “Lada kita kiba ong biej ne kiba ong ba ka jingngeit biej, wan markhmat , ngin ym ia beiñ ngin ym ia nia , ngin ym ia shrut hynrei ngin ia kren markhmat ba kin shai” ong u bah Pran. U bah Pran u la ong ruh ba u kloi ban ia tainia bad ki briew kiba kynnoh ba kane ka jingngeit u Khasi ka dei ka jingngeit biej.