Mih ka seng sain pyrthei thymmai ha Assam, halor ka ishu CAA

Ka Assam, ka don mynta ha ka kordit kaba jur shi katdei bad katei ka dei na ka daw jong ka khlam covid 19 bad nangta sa na ka jingshlei um, kaba da jur tasam ha une u snem.

Ka elekshon ha Assam, kan long ha u snem u ban wan bad la iathuh ba mynta, ka la sdang paw pyrthei, kawei ka seng sain pyrthei bad kata ka dei ka Anchalik Gana Morcha bad la iathuh ba katei ka seng sain pyrthei, kan mih madan ha ka elekshon ban sa wan, ha kaba yn ialam ia katei ka seng, da uwei u nongthoh khubor, uba dei ruh u dkhot ka Rajya Sabbha, U Ajit Kumar Bhuyan bad nangta, u nongialam barim ka BJP, U Prodyut Bora, bad nangta u nongialam ka Liberal Democratic Party (LDP).

Ka jingmih pyrthei jong katei ka seng, la iathuh ba ka dei na ka bynta ka jingmih jong u paidlang ba bun jong ka Assam, ban iakhun pyrshah ia ka ain Citizenship Amendment Act (CAA), kaba ka sorkar India, ka la rai ban pyntrei kam ha ka Jylla Assam bad sha ki bynta jong ka dong shatei lam mihngi hi baroh kawei.