Ka Khana thok shaphang u Tirot Sing Syiem lieh

Purningstar Shabong

Lah da ki phew phew snem, ka Jaitbynriew jong ngi ka shu bud matlah bad ngeit beit ïa kaei kaei kaba u nongwei u kren ne buh dak. Kane ka jingngeit lamwir da shisha ka la ïoh ban long doh long snam bad rung shaduh ki khlieñ shyieng jong ka longrynïeng ki khun ka Ri naduh kato ka por ba ka umsaw pynum mynsiem ka ïoh ban sar phar ha ka Ri jong ngi. Katei ka umsaw pynum mynsiem ka khlaiñ bor haduh katta katta haduh ba ka la lah ban rong bad ban kit noh soit ïa ka bor pyrkhat ba laitluid jong ki khun ka Ri Hynñiewtrep jong ngi bad ka pynneh pynsah ha ka kamra jong ka bor pyrtkhat tang da kaei kaei kaba ka umsaw kala wanrah bad wan kit bad ka klet ka baluiñ noh ïa ki jingshisha.

Hooid, bun ki jingthoh shaphang u Tirot Sing ki long kiba shisha. Hynrei don pat ki jingthoh kiba shu thok na ka daw ba u nongthoh u khwan ranab shalade bad ban pynkiew burom ïalade. Bad dei na kane ka daw la shu thaw pynwandur bha (modify) noh kumwei. Kumta ki don ki khana shaphang u tei u Riew Khraw jong ngi kila shu thok shu shukor kumne:

1. Ka jingong ba dei ka kmie jong u Tirot Sing (Ksan Syiemlieh) kaba shet shukor ïa u: kane ka jingong ba dei ka Kmie jong u Tirot Sing kaba la shet shukor ïa u Tirot Sing kaba la mih ha kiba bun ki jingthoh bad ki kot pule ka long kaba bakla bad kaba ym lah ban pdiang da leilei ruh. Ha u snem 1829 ka jingrai Rangbah jong u Syiem Tirot Sing ban beh noh bad pynïap na phang ïa ki phareng kam dei satia ka Rai shimet jong u marwei. Hynrei ka dei ka Rai kaba la shim lang ha ïng ha sem jong u ryngkat ka kmie jong u, ki hynmen para jong u kum ka ïng kaba bat ïa ka jingshynshar jong ka Hima. Ka jingrai Rangbah jong U kam dei hi ruh na ka daw shimet, hynrei ka dei ka dawbah jong ki khun ki hajar ka Hima Nongkhlaw hi baroh kawei. U Tirot Sing um shym la shim rai sha lum sha wah, sha khlaw sha btap ne sha rud sha kiar kumba la pyni dak ha ka jingthoh khana, hynrei u shim ïa ka Rai rangbah jong u na la Rympei ïng bad na Rympei Hima (ïng sad ïng sunon) da ka jingïa mynjur lang ki myntri ki korbar-ri.
   Ka jingshim rai jong u Tirot Sing ka dei namar ba la kyang shla lut ki khun ki hajar, la lynïar shla lut ki kynthei bad khynnah kynthei namar ba ki phareng kila leh bor bad leh be-ijot ïa ki kynthei khynnah wat ïa kiba la tymmen haduh ba wat tang ban mih leit lum, leit trei ne leit ïew leit hat ruh ym nud shuh. Ym tang kata, ka jinglehbor thombor jong ki ïa ki khun ki hajar ka Hima Nongkhlaw baroh kawei ha kiba bun ki bynta kala pynsat sia haduh katta katta. Bad kane ka jingleh jong ki phareng ka la ktah eh ïa ka ïng ki nongshynshar. Kumta ha kum kane ka por jong ka jingbitar lep da baroh ban ong eh ba dei ka kmie u Tirot Sing kaba phah leit pasiaw ïa u David Scott ba un phet noh ba la mut wan pynïap u Tirot Sing te ka long kaba bakla bad kaba ym lah ban pdiang. Kumno ha kat kata ka jingbitar jong baroh kan dang leit ïarap? Ha kito ki por, haba ong ba ki kynthei ki la tieng haduh katta katta ban mih namar ba ki shipai phareng ki batbor bad leh be-ijot beit kat ïa kiba ïoh. Hato phi mutdur ba kata ka Kmie jong u Tirot Sing kan dang leit ïarap? Hato kata ka shakri kan dang nud ban leit pasiaw ïa u David Scott? Ha ka jingshisha lada dei ba ka ïa kynduh mar khmat ma ka lei lei ne ba kan da ïoh lad ban phah leit pasiaw leilei kan dei ma ka ka ban dung tari nyngkong ïa u David Scott bad ruh ki shipai jong ka Hima ruh kin jyn da la ïoh ban pynïap suk ïa u David Scott. Ym tang kata, haba baroh ki kynthei kila mih madan da ka jingbitar bad kila ïoh ruh ban pynïap ïa shibun ki shipai phareng, hato ka kmie jong u bad kata ka shakri kim bna shaphang kata ba kan leit ïarap ïa u?
2. Ka jingthoh ba ki Khasi ki ñiew burom bha ïa u David Scott: Ki jingthoh ba la thoh da kiba bun ki Nongthoh ki dei kaba shu bud beit khlem puson bad khlem buh jingkylli. Na kata ka daw kiba bun ki nongpule bad ki longdien ïa ka bym sngew lah ngeit ruh hap ïa ngeit la ka ngeit namar ba ka la don ha ka jingthoh. Ha ka jingshisha ka jingïoh lad jong ka sorkar phareng ban pom lynti lyngba ka Hima Nongkhlaw kam dei da ka da ka lynti kaba jaijai, hynrei ka dei da ka ba shu pynbor. Ha kito ki por, ka Ri Thor Assam bad Bengal (Sylhet)ka la shah jop thma ha ki phareng bad ka jingjop thma jong ki ka long ba ki la ïoh ban knieh noh ruh ïa ka Dordwar kaba dei ka jaka jong ka Hima Nongkhlaw. Ha kaba nyngkong, ka sorkar phareng ka mut ban thom da ka bor sha kane ka Ri jong ngi, hynrei kam ïoh bor bad kam ïoh lad hi ruh ban thom da ka bor bad dei na kata ka daw, ka pynbiej da kaba ong ba lada u Tirot Sing u shah ban pom surok lyngba ka Nongkhlaw, ka sorkar phareng kan pynphai noh mardor ïa ka Bordwar sha ka Hima Nongkhlaw.
   Kumta, Hooid dei u David Scott uba la wanrah ïa ki katto katne ki jingthung sha ka Ri jong ngi ha kito ki por, hynrei ban ong eh ba baroh ki Khasi ne ki Khasi ki ñiew burom bha ïa u kum u briew uba bha, u briew uba isynei bad ïarap ïa ki rit ki ria te ka long ka khana thok khana shukor. Kumno kin burom haba kat kato ka kam thombor jong u bad ki briew jong u kila leh? Hato u dei uba bha? Hato u dei uba don burom? Hato u dei uba ïarap ïa ki ba rit ba ria? Lada u don kum kata ka jinglong kaba haduh ba ki Khasi kin da ñiew burom ïa u kumba ki nongthoh kila thoh, te balei pat u dang thombor ïa ki Khasi? Balei pat ki briew jong ki ki dang nud ban leh be-ijot ïa ki kynthei khynnah jong ka It ka Hima bad pynbor ïa ki rit ki ria ba kin kohnguh kat ka jinghukum jong ki? Kumta ka jingthoh ba ki Khasi ki burom bha ïa u ka long ka bym don nongrim bad bym shong nia eiei bad ka dei ruh ka buit khwan ranab, khwan burom bad pynkiew skong da lade ïalade ne da la u jong u para jait para kynja jong u hi watla ka jingshisha ka la paw pylleiñ pylleiñ ba ki Khasi ki isih ïa ka jinglong jong u.
3. Ki Shipai u Tirot Sing ki lap miet ban khar pisa: Ka jingpyndonkam paidbah ïa ka pisa ha ka Ri jong ngi ka sdang ha ki por ba pyndonkam ïa ki anna. Ïa ka pisa nar anna la thaw nyngkong ha India ha ka snem 1950 bad hadien jong u tei u snam ter ter sa pynmih sa ki naya bad haduh tyngka kumba ka long mynta. Ha ki tei ki por jong u Tirot Sing, ki briew jong ngi ki dang pyndonkam da kaba shu ïa bujli (bartar system) bad dei na kane ka daw, ka sorkar phareng ha kito ki por ba ka pan jaka na u Tirot Sing ban shna surok kam shym la tyrwa da ka pisa, hynrei ka tyrwa da ka jaka (Bordwar).
   Hooid ka sorkar phreng bad don ki briew ha India ha ki tei ki por kila pyndonkam ïa ka pisa nar hynrei ha kiba bun ki jaka ha ka tei ka por ym pat shym la pyndonkam pisa bad kiba bun ki briew kim pat ithuh ïa kata ka pisa. Kumta ban ong ba kita ki Shipai Khatsaw Phra ki lap miet ka khar pisa ba bret kita ki shipai jong u David Scott ka long ka khana thok namar ha kum kito ki por ka pisa kaba ki phareng ki pyndonkam kam pat treikam paidbah ha kane ka Ri Khasi Jaintia jong ngi. Lada ha ka tei ka por ki la pyndonkam pisa, ka dei ban don mynta ha ki jaka lum thup ïa ki mar ba pyndonkam u mynbarim.

Para Ri baieid, kynmaw ba kham bunsien ïa ka jingïathuh khana (history) jong ki jingjia ha ki bynta ba pher ba pher jong ka pyrthei la thoh da ki briew kiba jop thma, ym da ki briew kiba rem. Kumta kiba jop ki lah ban thoh katba mon, ki lah ban pynkylla hangne hangtai katba ki sngew bit bad horkit hordang kim juh thoh ïa kaei kaei ka bym ïahap ne kaba ktah ïa kita ki nongthoh. Namar kata, ka tei ka jingong ba ka kmie jong u Tirot Sing ka shet kylla ïa u ka dei ka khana thok kaba ym lah ban pdiang. Ka dei ruh ka buit ban kren arsap bad kren poh ïa u Tirot Sing da kaba thmu ba ki khun ki hajar jong ka Hima bad ruh jong ki Hima ba pher ba pher kin thrai riewkai ïa u Tirot Sing bad ba kin ym burom shuh ïa u da kaba bsuh ka khana kum ka rai shi met bad da kaba bshuh da ka kyrteng jong ka kmie jong u kum ka nongpynlait im ïa u David Scott khnang ban sngew myllung ïa u David Scott bad ban ïalam bakla ïa kiwei.

Ka dei ruh ka buit ban bsuh da ka jing ïa tharai sniew para Khasi ban ong ba uta u shet kylla ne kata ka shet kylla da kaba ki biej pisa noh ne da kumne kumtai khnang ba kan duh noh ka jingïa shaniah iwei ïa iwei. Bad da kaba bshuh ruh ba dei u Syiem Sohra uba pynrieh da kaba tap da u thlong ka dei ka buit ban pynïashrut para Syiem Khasi bad dei lyngba jong kane ka buit kaba la pynlong ïa ka jingthmu jong ki kaba paw pyrthei kum ka kam “Phiah bad Synshar” ne ka ‘Divide and Rule Policy’. Kato ka buit poh jong ki ka lah ban wanrah ïa ka jingïapher jingmut bad haba ki ïapher jingmut ka wanrah ka jingïaleh para Khasi bad hangta haba ki ïaleh u sa ïoh ban jop thma da kaba suk. Kumta dei da kane ka buit kiba bun ki hap ban pyndem lin.

Kumta keiñ para Ri, ngi dei ban pynshongdor bha bin pa bin namar ba ka jingïathuh khana shaphang jong u Tirot Sing ka ïa tyngkhuh kawei ka bynta bad kawei pat. Bad dei halor kane ka paw shai ba ki don ki bynta shaphang ka jingjia jong u Tirot Sing la pynjah noh bad la thoh bakla da kumwei. Kynmaw ba u Tirot Sing um long kum kine ki katto katne ngut ki syiem ba mynta kiba rai marwei ne tang da ki kato katne ngut. Hynrei ka Dorbar ha ki por jong u Tirot Sing ka dei ka Dorbar Blei kaba hap ban da ïaid bad rai da ka tip briew tip Blei bad ka jingïa tai bin pa bin bad ïa mynjur lang. kumta, kum ka Jaitbynriew, ïa kum ki tei ki khana thok kiba nga la kdew bad kiwei kiwei ki khana thok ki bym la kdew dei ban kyntait noh.

Kum ka Jaitbynriew, nalor ka nam ba la pynkup ïa u Tirot Sing kum u nongïaleh laitluid na kti jong u nongshun, ngi la dei ruh ban pynkup nam pynkup burom ïa u kum u Syiem ba nyngkong eh ha ka Ri Hynñiewtrep uba wanrah ïa ka jingïatylli hapdeng ki para Syiem Khasi namar u dei uba nyngkong uba la paw ha ka khana pateng uba la lum la lang ïa ki Syiem Khasi na ka bynta ka jing ïa tylli.