Phiel ka jingpyniaid, naduh u 1999, ym thikna tulop ki nongtrei MTC rTang ka bai hotel bad dukan la bun ka jingmih

Shillong 10 Naiwieng:
Ka jingsynjor ka tnad pyniaid kali jong ka Meghalaya Transport Corporation (MTC) ka la sdang naduh u snem 1999 bad katba nang mih ki sngi, la nang synjor synjor shuh haduh haduh ba ki nongtrei kin hap ban duh tulop bun bun bnai haduh mynta.
U Rupang u la ioh ban iakren bad ki nongtrei ka Meghalaya Transport Corporation Workers Union (MTCWU) ki la pynpaw ba kim sngew tynnad ia ka jingpyniaid jong ka tnad MTC kaba la pynbuh ia ki ha ka jingeh katba nang mih ki sngi khamtam ban ioh tulop.
U General secretary ka MTC Workers Union u Bah K Rumnong u la iathuh ba mynta ruh u snem la trei khlem ioh tulop haduh san bnai naduh u Naitung haduh u Naiwieng.
“Ngi la shu bam ram ha man ki dukan bad hadien bym ai ram shuh kawei, hap leit pan ram sa na kawei pat ka dukan”, la ong u Bah Rumnong.
U la ong ba la dep ban phah ia ka jingthoh sha ka sorkar hynrei haduh mynta kim pat ioh eiei ka jubab. “Ngin ap haduh ban kut une u bnai Naiwieng bad lada ngim ioh ia ka tulop, ngin hap ban mih madan biang kumba ju leh ha ki por ba la dep”, la ong u Bah Rumnong.
Ka jinglut na ka bynta ban siew tulop sha ki 300 ngut duna ki nongtrei ka la kot kumba T. 70 lak eiei ha ka shi bnai.
“Ngim sngewthuh balei ka sorkar kam lah ban siew thikna ia ka tulop haba ka don bun ki lad ban pynmih pisa na kane ka tnad”, la ong u Bah Rumnong.
U la ong ba ka MTC kaba don ha Khyndai Lad, ka ai wai bun ki dukan, ki hotel, ki ophis bad ka lah ban pynmih da ki lak ha ka shi bnai. Nalor ka pyniaid ia ki kali ruh watla ka kham duna ia ka jingkamai hadien ba la ailad pathar ka sorkar ia ki kali shimet khamtam na Shillong sha Guwahati.
Tang ha katei ka jaka jong ka MTC ki don kumba ar tylli eiei ki iingbasa kiba shongwai ha ka MTC, nalor ki ophis kum ka Meghalaya Rural Bank, ki dukan.
U la iathuh ba ia mynta ka MTC ka pyniaid bus tang na Shillong sha Garo Hills bad sha Guwahati ki duna bha. “Ha ka jingshisha ka Shillong-Guwahati ka dei ka lynti kaba donkam bha kaba pynkiew ia ka bai kamai jong ka tnad namar ba ka dei ka surok kaba iaid paidbah, hynrei naduh ba la pynduna ia ki boss ha Guwahati, ka la ktah jur ia ka iarong pisa ka tnad.
U la ong ba kane ka baroh ka dei namar ka jingsynjor ka jingbym biang ka jingpyniaid ia ka Corparation kaba la pynlong langknia ia ki nongtrei baroh.