Shah dawa bai skul bad ka bai iing

Bah Monarch Shabong

Ka khlam corona virus, kam shym la sympat tang ia uba ioh pang khlam corona, hynrei katba nang iaid ki sngi, la iohi, ba kiba shah sympat jur, ki dei pynban, kito kiba lah ban sumar bha ialade, ban lait na katei ka jingpang khlam.

Uba ioh pang, u ioh shibun ka jing iarap, ka jing ai mynsiem bad ka jingiaroh, ha kaba baroh ki ia thab kti haba ia kynduh ia uba pang corona bad ki ai, ka bam ka dih ka biang ia uba pang bad imat ia kiba ha iing ha sem jongu ruh; hynrei kiba khlain, ki la nang shah khyrwait bad kata ka long ba ki hap thied bam ha ka dor, kaba rem, ki hap leit jingleit ha ka dor kaba rem, ki hap ban siew khajna kaba la nang rem bad nang kiew stet shajrong bad ka sorkar ka pynnoh synei, tang u khaw; katba, ka dohkha, ka doh masi, ki jhur ki nang kynting ka dor man ka sngi. Kam dei tang kumta, ki bor pyniaid skul, kim sngap satia ia ka sorkar bad ki dawa ia la ka jong ka bai skul bad katei ka dei ka jing shisha, namar ba ki hap siew bai iing, bai light, bai nonghikai bad sa kiba bun kiwei ki jingdawa.

Hynrei kam dei tang katta, ki trai iing ha kine ki sngi, ki beh ia ki nongshong wai, la kumba beh ksew bad kim shah ba kin rung ha ki iing shong jongki, kiba ki la dep siew bai wai iing bad kam dei tang katta, ki don don bah, ki nongshong wai, kiba la leit phai sha la ki shnong bad ki iing ki shu khang tala, hynrei ka bai wai iing ki hap ban siew thik thik bad katei ka dei ka jingjia ha ka kyrteng ka khlam corona.

Na ka liang ka sorkar jylla, ha ki khyndiat taiew ba ladep, ka la pynsngew sha ki trai iing, ba kin ia map bai wai iing, hynrei katei kam rung satia ha thliew shkor jong ki trai iing bad katei ka buh jingeh shibun ia ki nong kyndong, ia ki khynnah skul, kiba shah nion ia ka bai wai iing iing bad ka rukom siew bai wai, ha kum kine ki khep.

Ngim tip, haba ka sorkar, ka kren kumto, la ka dei tang ka jing kyrpad ne ka sngew donbor ia ki trai iing; hynrei haba ka lah kren, ka dei ban peit, ba ki trai iing, kin sngap ne kin ioh sngew bad lada jia ba kim sngap, ka lah ban pynbud, da ki ain jongka, lyngba ki bor shnong, lyngba ka jing ai bor ding lane lyngba ka jing ai um sha kiba kum kitei ki iing; hynrei lada ha kum kane ka saw ka sian, ka don ka jingnion bein ia ki nong shongwai, kumta ka dei ka jing thombor kaba la palat liam shisha.