Ioh bat ki VDP ka Tuber Kmai Shnong ia ka kali ba pyndonkam ha ka tuh ka lute

Jowai: Mynta ka step synnia, ki dkhot ka VDP ka Tuber Kmai Shnong, ki la ioh bat ia ki lai tylli ki kali kiba kynthup ia ki ar tylli ki Tata Sumo bad kawei ka Maruti Car kiba donkti ban lute bad tuh umphniang na kawei ka Petrol Pump kaba don ha Tuber Khmai Shnong.

U tyllong khubor na ka shnong ka la iathuh ba ia kitei ki kali la ioh bat ha ka por 2 baje step synnia hadien ba la pynlong ia ka jingap-miet hadien ba la ioh ki jingujor ba ki don ka kynhun kiba donkti ban tuh bad ban lute ha ki bynta jong u surok bah NH-06.

Ki briew kiba donkti ha katei ka jinglute la phet da ka maruti car sha liang ka wah Myntang shaduh palat Laskein da kaba ia beh thong da ki Pulit na Ladrymbai bad ki VDP la ioh bat ia katei ka kali ba la hap sha poh nala.

Katei ka Maruti 800 ka don ia u No, Ml10-7887 katba kawei ka Tata Sumo kaba la shu ieh ha Petrol Pump ka don ar tylli ki Nombor – ML04-7949 uba dei u Nombor ba shisha katba ML04A-6874 pat uba dei u Nombor Thok, katba kawei pat ka Tata Sumo ym shym la ioh bat satia namar ba ka la ioh phet.
Wat lada ym shym la lah ban iohkem ia kiba donkti, hynrei na ka liang ka bor shnong ka la maham jur ba kan nym ailad satia ia kum kine ki jaitbriew kiba wan tuh ban lute na poh u pud u sam ka shnong bad ban rat dyngkhong ia kane ka bor shnong kan ai ka jingiatreilang kaba pura bad ki bor pulit.
Ka bor Shnong ka la kynnoh ruh ba kine ki kynhun Kang ki la donkti ruh ban lute ia kawei ka trok kaba pomshor (lait lyer ka shaka) bad kaba la pynieng harud surok bah.

Lah ban pynkynmaw ruh bda dangshet uwei u driver trok u la ujor sha ki pulit ka East Jaintia ba u la shah lute ha k briew kiba wan da ka Maruti Car bad ki la rah bor ia ka trok jong u sha jan ka shnong Iongkaluh bad ki la lute ia u T. 15000 tyngka.